کەمینی کەمینەکان

عەلی عه‌بدولصه‌مه‌د
  2020-05-12     428
لەم چەند ساڵەدا ئەوەی فیکەی یەک لاکەرەوەی زۆرێك لە پرس و ڕوداوەکانی نێو پەرلەمانی لێداوە و پارسەنگی هێز و  ویستی بۆ حیزبەکانی دەسەڵات یەکلاکردۆتەوە، ئەو دەنگانەن کە پێیان دەوترێت، کورسی کۆتاکان، یاخود پێکهاتە و کەمایەتییە نەتەوەی و ئاینیەکان، ئەو کورسیانەی یاریەکی دیکەی دەسەڵاتن بۆ خزمەتی بەرژوەندیەکانی خۆی و   دژایەتی پێکردنی  نەیارەکانی، لەنێو بەرگی ئاینی و نەتەوایەتی پێکهاتە کەمینەکاندا. 

ئەوانەی بە کەمترین دەنگ و بە دەنگی سێ سەد بۆ چوار سەد کەس بوونەتە ئەندامی پەرلەمان و بە تێكڕا دەتوانن لە بەرژەوەندی حیزب و هێزەکانی دەسەڵات، دەنگی پەرلەمانتارێك کپ کەن کە دەیان هەزار دەنگی خەڵکی هەرێمی کوردستانی بەدەست هێناوە بۆ نوێنەرایەتی کردنیان و هەر بڕیارێکی دیکەش پەسەند بکەن کە لە بەرژەوەندی حیزبێکی دیاریکراوبێت. 

ئەمانە ئەگەر لە ڕووی ئاینی و بیروباوەڕەوە خۆیان بەجیاواز نیشان دابێت، ئەوا لەڕووی ئەجێندا و ناوەڕۆکی سیاسیەوە، هەمان ئەجێنداو بەرنامەی حیزبەکانی دەسەڵاتیان جێبەجێکردووە و چەند بەرانبەر بە ئەندام و پەرلەمانتارانی حیزبەکانی دەسەڵات، خزمەتیان بە ویست و ئامانجەکانی دەسەڵات کردووە و لە کاتە چارەنوس سازەکاندا بونەتە فیکەی کۆتایی یاریەکە بۆ بەرژەوەندی دەسەڵات .

وەک بەشێك لە کایەکانی دیکەی هەرێمی کوردستان، کەمەنەتەوایەیتی  و ئاینیەکانیش، فۆڕمێکی سیاسی بەبەردا کراوە، وەک لەوەی فۆڕمێکی نەتەوەی و ئاینی بێت و  پارێزەری ئەجێنداکانی دەسەڵات بوون، نەک نوێنەرێکی ڕاستەقینەی کەمایەتیەکان.

لەپاڵ حیزبەکانی دەسەڵاتدا، ئەم پێکهاتە و کەمینانە، لە کەمین دابوون بۆ  سەنگەرگرتن و کپکردنی ئەو دەنگ و ئیرادە سیاسیانەی کە ئامانجیان خزمەتکردنی بەرژەوەندی گشتی و دژایەتیکردنی ویستی خۆسەپاندنی حیزب و کەسانێکی دیاریکراو بووە، 

ئەوە جگە لە نوێنەرایەتی نەکردنی ڕاستەقینەی کەمایەتی و پێکهاتەکان و لەناوەڕۆکیشدا جێبەجێکاری ویست و ئامانجەکانی دەسەڵات بوون و پشکیان هەبووە لەبەشێك لەو بڕیار و هۆکارانەی کە بوونەتە هۆی خراپبوونی ژیانی خەڵك و پاراستنی ویست و  بەرژەوەندیەکانی دەسەڵات و چەند کەسێك. 
زۆرترین بینراو
© 2020 Awene Online, Inc. All Rights Reserved.
×