2019-08-24 1171
ڕاوێژکارێكی بەشار ئەسەد، رایده‌گه‌یه‌نێت ''تورکیا خاڵە چاودێرییەکانی لە شاری ئیدلیب و ناوچەکانی دەوروبەری بۆ پڕچەک کردنی چەکدارە توندڕەوەکان بەکار دەهێنێت، و هەڕەشەی لەناوبردنی خاڵە چاودێرییەکانی تورکیا لە لایەن هێزەکانی سوپای سوریاوە دەکات''.
ئاوێنه: بوسەینا شەعبان، ڕاوێژکاری بەشار ئەسەد، سەرۆکی سوریا، لە چاوپێکەوتنێکیدا لەگەڵ تەلەفیزیۆنی ئەلمەدائین کە لە وڵاتی لوبنان پەخش دەکات، ئاماژەی بۆ ئەوە کرد کە بە بەڵگە سەلماندویانە تورکیا خاڵە چاودێرییەکانی لە شاری ئیدلیب و ناوچەکانی دەوروبەری بۆ پڕچەک کردنی چەکدارە توندڕەوەکان بەکار دەهێنێت. بوسەینا شەعبان وتی ''تورکیا ئەو ئەرک و بەرپرسیارێتییانەی بەجێ نەگەیاند کە لە چوارچێوەی ڕێکەوتننامەی سۆچی دەکەوتە سەر شانی و خاڵە چاودێرییەکانی کردووە بە بنکەی ڕەوانەکردنی چەک و کۆمەڵە خاڵێک بۆ داگیرکردنی خاکی سوریا''.
بوسەینا شەعبان لە درێژەی قسەکانیدا هەڕەشەی لە خاڵە چاودێرییەکانی تورکیا کرد و وتی ''لە ئێستادا خاڵێکی چادێری تورکی لە گوندی موریک لە ژێر گەمارۆدایە. سوپای سوریا دەتوانێت هەموو خاڵە چاودێرییەکانی تورکیا و تەواوی چەکدارەکانی سه‌ر به‌و وڵاته لەناو ببات''.