شاناز ئیبراهیم ئەحمەد ئاماژە بەوە دەکات کە هەولێر داگیر کراوەو پارتی رۆژ به‌رۆژ نه‌ك هه‌ر هه‌ولێرو بازگه‌كان به‌ڵكو كوردستانیش ده‌بێته هی خۆیان، ئەو دەڵێت "خزمینه یه‌كێتى له‌كوله‌كه‌ى ته‌ڕیشدا نه‌ماوه".
ئاوێنە: شاناز ئیبراهیم ئەحمەد، بەرپرسی رێکخستنەکانی دەرەوەی یەکێتی، لەنوسینێکدا بەناونیشانی "پاكێجه‌كه‌تان جوانه به‌ڕێز" کە لەهەژماری تایبەتی خۆی لەتۆڕی کۆمەڵایەتی فەیسبوک بڵاویکردوەتەوە، رەخنە لەئەدای حزبەکەی دەگرتێت بەرامبەر بەپارتی‌و دەڵێت "خۆ پێمان ووتن و گوتمان بیكه‌نه ڕای خوا یه‌كێتى مه‌شكێنن و بچووكى مه‌كه‌نه‌وه له‌به‌رده‌م پارتى فه‌رموتان "ده‌بینه شه‌ریك و هاوبه‌شی راسته‌قینه" ، خوا ده‌ست به باڵتانه‌وه نه‌گرێت".
دەقی نوسینەکەی شاناز ئیبراهیم ئەحمەد:
پاكێجه‌كه‌تان جوانه به‌ڕێز
په‌نجه‌ى تۆمه‌تى ئێوه شتێكه و عه‌قڵ و بیركردنه‌وه‌ى ئێمه‌ش شتێكى تر، به‌رده‌وام ئه‌وه‌ى ئێمه ده‌یڵێین و ده‌ینوسین شتێكه و ئه‌وه‌ى ئێوه‌ش له‌سه‌ر ئه‌رزى واقیع جێبه‌جێی ده‌كه‌ن شتێكى تره ، ئه‌وه‌ى ئێمه ده‌یخوازین بۆ ئه‌وه‌ى یه‌كێتى بكه‌ینه‌وه به یه‌كێـتییه‌كه‌ى مام و رابه‌ری بزووتنه‌وه‌ى رزگاریخوازى كوردستان شتێكه و ئه‌وه‌ى ئێوه‌ش ده‌تانه‌وێ بیكه‌نه‌وه به رۆبۆتى ده‌ستى ئه‌جێندا و خه‌یاڵپڵاوییه‌كانى ئه‌ولا شتێكى تره ..
كه ئێمه ده‌مانگووت هه‌ولێر براده‌رینه هه‌ولێر داگیركراوه ، ده‌تان فه‌رموو (یه‌كڕیزى نیشتمانى تێكده‌ده‌ین) ، كه ده‌مانگوت براله رۆژێك دێت ئه‌م بێده‌نگیه‌تان به‌رامبه‌ر به رێگریكردن له گه‌ڕانه‌وه‌ى سه‌رۆكى په‌رله‌مان بۆ هه‌ولێر وه‌ك چیرۆكه‌كانى عه‌زیز نه‌سین به‌سه‌رخۆتان دێته‌وه ، ده‌تان فه‌رموو "كوڕى خۆمان ناكه‌ین بەقوربانی كچی خه‌ڵکی"، كه گوتمان كاكه چیرۆكی یوسف كۆتایی هات و ئێستا نۆبه‌ى ڕێگرییه له جێگری سكرتێری گشتى یه‌كێتى، فه‌رمووتان "له‌وپه‌ڕى ته‌باییداین"، كه گوتمان هه‌ڤاڵ ئاخر خوا نه‌تگرێ فریای كادرانى یه‌كێتى بكه‌ون له‌و زۆنه داگیركرداوه و رۆژانه ده‌ڕفێنرێن و ده‌گیرێن و له‌ماڵ و حاڵى خۆیان ده‌رده‌كرێن و روبه‌ڕووى هه‌موو جۆره‌كانى سوكایه‌تى ده‌كرێنه‌وه ، فه‌رمووتان "واز له‌و چیرۆكه لاوه‌كیانه بێنن، ئێمه سه‌رقاڵى سازانین"
گوتمان سازانى چی له‌سایه‌ى ئه‌و هه‌موو سوكایه‌تى و ده‌رده‌سه‌رییه ، دیسانه‌وه فه‌رمووتان "ئێمه پرۆژه و خه‌ونى هاوبه‌شمان هه‌یه و ده‌تانه‌وێت تێكی بده‌ن"، دیسانه‌وه هه‌ر كۆڵمان نه‌داو ووتمان "خزمینه یه‌كێتى له‌كوله‌كه‌ى ته‌ڕیشدا نه‌ماوه ، دیسانه‌وه فه‌رمووتان "ئاژاوه ده‌نێیته‌وه"، گوتمان ده‌ى دوا ده‌رفه‌ته به به هێزى و شكۆ و هێزه‌وه به‌شداری دانوستان و گفتوگۆكان بكه‌ن ، كه‌چی ئێوه هه‌ر به خه‌یاڵپڵاوى خۆتانه‌وه، ووتتان "شانده‌كه‌مان له پاكێجدا پسپۆڕه"
خۆ پێمان ووتن و گوتمان بیكه‌نه ڕای خوا یه‌كێتى مه‌شكێنن و بچووكى مه‌كه‌نه‌وه له‌به‌رده‌م پارتى فه‌رموتان "ده‌بینه شه‌ریك و هاوبه‌شی راسته‌قینه" ، خوا ده‌ست به باڵتانه‌وه نه‌گرێت خۆ پێمان گوتن ئاخر ره‌دوكه‌وتوومان زۆره و نه‌خۆشی زه‌ردویی له‌ناو جه‌سته‌ى به‌شێكدا بڵاوبۆته‌وه و تازووه سزایان بده‌ن، كه‌چی ئێوه گوتتان "چیرۆكى سه‌مه‌ره بۆ هه‌ڤاڵان هه‌ڵده‌به‌ستى"، گوتمان براینه كه‌ركوك مه‌خه‌نه پاكێجه‌وه، هه‌ندێك هێنده زه‌رد هه‌ڵبڕزكان پێیانوابوو مورافه‌عه‌ى دووه‌م ده‌كه‌ن و كوردایه‌تى و كه‌ركوك ده‌گێڕنه‌وه و ووتیان "تۆ شوێن مه‌حاڵ ده‌كه‌ویت"، ئێستاش كاتى ئه‌وه‌یه ئێمه بڵێین ده‌ك پیرۆزتان بێت پاكێج و شه‌راكه‌ت و هاوبه‌شییه راسته‌قینه‌كه‌تان، كه هه‌م به‌غداد و هه‌م كه‌ركوك و هه‌میش كوردستانتان له‌ده‌ستدا، به‌ڵام دڵنیام دیسانه‌وه ده‌ڵێن"ئاخر خۆ گه‌ڕه‌ك و گردێكمان هه‌ر به‌ده‌سته‌وه ماوه". ئێمه هه‌ر ده‌ڵێین و ئێوه‌ش هه‌ر خه‌ریكى پاساون، بۆیه‌ش رۆژ به‌رۆژ نه‌ك هه‌ر هه‌ولێر و بازگه‌كان به‌ڵكو كوردستانیش ده‌بێته هی خۆیان.
شاناز برایم ئه‌حمه‌د
١٩-٩-٢٠١٩