ئاسایشی هەولێر رایگەیاند، لە چوارڕێیانی قەزای قوشتەپەی هەولێر، لەسەر كێشەیەكی كۆمەڵایەتی نێوان دو بنەماڵە كە زاواو خەزوری یەكترن، تەقە لە ئۆتۆمبێلێكی بارهەڵگر كراوە، سێ تۆمەتباری تەقەكردنەكەیان دەستگیركردون و روداوەكەش زیانی گیانی لێ نەكەوتۆتەوە.
ئاوێنە: بەڕێوەبەرایەتی ئاسایشی هەولێر، ئێوارەی ئەمڕۆ پێنجشەممە، رونكردنەوەیەكی لەبارەی تەقەکردن لە ئۆتۆمبێلێکی بارهەڵگر لە چوارڕێیانی قەزای قوشتەپەی شاری هەولێر بڵاوكردەوە.
بەقسەی ئاسایش روداوی تەقەكردنەكە "هیچ زیانێکی گیانی لێ نەکەوتەوە" و دوای ئەنجامدانی بەدواداچون لە لایەن هێزەکانیانەوە دەرکەوتوە روداوەکە بۆ کێشەیەکی کۆمەڵایەتی دەگەڕێتەوە لە نێوان دو بنەماڵەدا، کە زاوا و خەزوری یەکترن.
ئاسایش وتوشیەتی، لەسەر ئەم روداوە بەفەرمانی دادوەری لێکۆڵینەوەی ئاسایشی هەولێر، سێ تۆمەتباریان بە ناوەکانی (ع. خ. ع.) و (ع. ر. خ.) و (م. م. خ.) دەستگیرکردون کە تەقەیان کردبو و دەست بەسەر چەکەکانیاندا گیراوە.