لە کاتێکدا دیمەنە مەیدانییەکان و بەدواداچوونە فەرمییەکان زنجیرەیەک سەرپێچیی مەترسیدار لە پڕۆژەی گەشتیاری و نیشتەجێبوونی «بەهەشتی ئەزمەڕ» ئاشکرا دەکەن، سەرۆکایەتی و ئەنجومەنی شارەوانیی سلێمانی هەڵوێستێکی توندیان ڕاگەیاند و مەرجی یەکلاکەرەوەیان بۆ کۆمپانیای جێبەجێکار دانا.
ئاوێنە: پڕۆژەکە، کە لەسەر ڕووبەرێکی گەورەی ناو پارکی هەواری شار بە قەبارەی نزیکەی یەک ملیۆن و حەوت سەد هەزار مەتر دووجا (١٧٦٤ دۆنم) مۆڵەتی پێدراوە، ئامانج لێی دروستکردنی کۆمەڵگەیەکی هەمەچەشنی گەشتیاری بوو کە چەندین پێکهاتەی وەک شۆقە، ڤێلا، بەنداو، شاری یاری، باخچەی ئاژەڵان، ئەکواپارک، هۆتێل، سینەما، یاریگەی گۆڵف و کۆمەڵگەی وەرزشی لەخۆدەگرێت.
بەڵام بەگوێرەی نوێترین بەدواداچوونەکان، لە کاتی جێبەجێکردنی قۆناغەکانی ئەم پڕۆژە سەد ملیۆن دۆلارییەدا، زیاتر لە ١٣ سەرپێچی و پێشێلکاریی یاسایی و کارگێڕی تۆمار کراون کە زیانەکانیان بە چەند سەد ملیۆن دۆلار مەزەندە دەکرێت و نەخشە پەسەندکراوەکان و ڕێنماییە فەرمییەکانیان تێپەڕاندووە.
لە بەرامبەر ئەم پێشێلکارییە فراوانانەدا، لایەنە پەیوەندیدارەکانی شارەوانی جەخت لەوە دەکەنەوە کە بە هیچ شێوەیەک ڕێگە بە درێژەدان بەم دۆخە نادرێت و مەرجی ڕەهایان ئەوەیە کە دەبێت سەرجەم سەرپێچییەکان بە تەواوەتی و بەپێی یاسا و ڕێنماییەکان ڕاست بکرێنەوە. بە پێچەوانەوە، پڕۆژەکە ڕووبەڕووی ڕێکاری توندی یاسایی و کارگێڕی دەبێتەوە و مۆڵەتی پێویست بە یەکە و بەشە تەواونەکراوەکان نادرێت.
شارەوانیی سلێمانی و ئەنجومەنەکەی جەخت لەوە دەکەنەوە هیچ کام لە یەکەکان (وەک شۆقە، ڤێلا و پڕۆژەی نیشتەجێبوون) مۆڵەتی کۆتاییان پێ نادرێت.
ئەم پەرەسەندنە نوێیانە لە کاتێکدایە کە چاودێران و هاووڵاتییان بە وردی چاودێریی چارەنووسی ئەم پڕۆژە گەشتیارییە گەورەیە دەکەن و داوای شەفافیەت و پاراستنی سامانی گشتی و ژینگەی شارەکە دەکەن.