لیوا عەبدولكەریم
خەڵەف، وتەبێژی فەرماندەی گشتی هێزە چەكدارەكانی عێراق ئەو هەواڵانەی رەتكردەوە كە
باس لەوە دەكەن دوێنێ پێنجشەممە لە ریزی خۆپیشاندەراندا لە بەغدا كوژراو و بریندار
هەبوە.
ئاوێنە: لیوا
عەبدولكەریم خەڵەف لە بەیاننامەیەكدا رایگەیاند، ئەو هەواڵە هەڵبەستراوانە راست
نین كە لە لایەن هەندێك لە دەزگاكانەوە بڵاوكراونەتەوە گوایە قوربانی مرۆیی لە
هەردو گۆڕەپانی تەحریر و خەلانی هەبوە.
بەپێی قسەی وتەبێژی فەرماندەی گشتی هێزە
چەكدارەكانی عێراق، دوێنێ لەو دو گۆڕەپانەی بەغدا هیچ بەركەوتنێك لەنێوان هێزە
ئەمنییەكان و خۆپیشاندەراندا روینەداوە.
ئەوەش لەكاتێكدایە ئاژانسی رۆیتەرز
بڵاویكردبوەوە كە دوێنێ پێنجشەممە لەمیانی خۆپیشاندانەكاندا لەبەغدا حەوت كەس
كوژراون و 78 كەسیش بریندار بون.