بریار بۆ لسەر دەمێ رژێما بەعس هێلا شەمەندەفرێ بهێتە دانان، پشتی هندەك پارچێن زەڤی لسەر هاولاتێن سێ كومەلگەهان ل سنورێ قەزا زاخۆ هاتینە دان، باژێرڤانیا دهوكێ رێی نادەت خانیێن نوو بهێنە ئاڤاكرن.
ئاوێنە، وارهێل نێروەیی: سەروەر سەعید بۆ " ئاوێنە " راگەهاند: ئاریشە ل سنورێ رێڤەبەریا ناحیا رزگاری هەیە كو ژلایێ باژێرڤانیا زاخۆ 168 پارچە زەڤی هاتینە بەلاڤ كرن و لسەر ناڤێ وان كەسان هاتینە تاپو كرن بێ هیچ كێشەیەك، بەلێ خودانێن وان پارچێن زەڤیا دەستوریا ئاڤاكرنێ ژلاێی باژێرڤانیا گشتی یا دهوكێ ب وان ناهێتە دان، ژبەركو ل دبێژن ئەو پارچێن زەڤی دێ كەڤنە د رێیا هێلا شەمەندەفرێ دا.
گوت ژی: نڤیسارەك مە رەوانەكریە بۆ رێڤەبەریا گشتی باژێرڤانیان ل دهوكێ دا ئەڤ بابەتە بهێتە چارەسەر كرن، وان ژی ژلایێ خوەڤە دیار كریە دێ هەول هێتەدان بۆ چارەسەركرنێ دا ئەڤ كێشە بەردەوام نەبیت.
ئەو ژی ئاشكرا كر: هەر سێ كومەلگەهێن ( چەم كورك، خێلەخێ، باكرما ) ئەو خانیێن ل وان هەر سێ كومەلگەهان هاتینە ئاڤا كرن لسەر عەردێ وەزارەتا دارایی هاتینە ئاڤا كرن ئەگەر ل گورەیی وێ پلانێ بیت گەلەك خانی دی دێ كەڤنە بەر ڤی پرۆژەی، گەلەك داخازی هەنە ل دەوروبەرێن وان سێ كومەلگەهان خەلك خانیان ئاڤا بكەت ژبەركو ئەو پارچێن عەردی نەهاتینە مولكدار كرن، ئەم نەشێن رێی بدەینە هاولاتیان دەڤەرێ خانیان بخوە ئاڤا بكەن هەتا وان پارچێن عەردی مولكدار بكەین، هەردەمێ ئەڤ كێشە هاتە چارەسەر كرن ئەم دێ دەستوریا بەرفرەهكرنا وان كومەلگەهان دەین.