سه‌رۆكی په‌رله‌مانی ئێران‌ لە ڤایرۆسی كۆرۆنای چاکبوویەوە
  2020-04-27       738       

سه‌رۆكی په‌رله‌مانی ئێران، عه‌لی لاریجانی دوای تووشبوونی به‌ ڤایرۆسی كۆرۆنای نوێ، چاكبووه‌وه‌.

ئاوێنه‌: ئه‌سه‌دوڵڵا عه‌باسی، وته‌بێژی په‌رله‌مانی ئێران،  له‌ لێدوانێكیدا بۆ ئاژانسی هه‌واڵیی فه‌رمی ئێران IRNA رایگەیاند، نوێترین پشكنینەکان سەبارەت ڤایرۆسی كۆرۆنای نوێ کە بۆ لاریجانی ئەنجامدراون نێگه‌تیڤ ده‌رچوون‌ و چاره‌سه‌ری ته‌واوكردووه‌ و چاكبووه‌ته‌وه‌.

وتیشی، ”لاریجانی له‌ كه‌ره‌نتینه‌ ده‌رچووه و له‌ دوێنێوه‌ كاره‌كانی‌ رادەپەڕێنێت، هه‌روه‌ها ئه‌مڕۆ و سبه‌یش له‌ نووسینگه‌كه‌ی ده‌بێت”.

نووسینگه‌ی كولتووری په‌رله‌مان و په‌یوه‌ندییه‌كان له‌گه‌ڵ گه‌ل له‌ دووی نیساندا بڵاویكردبووەوە کە‌‌ پشكنینی عەلی لاریجانی بۆ ڤایرۆسی كۆرۆنای نوێ پۆزه‌تیڤ ده‌رچووه‌ و كه‌ره‌نتینه‌كراوه‌ و ده‌ست به‌ چاره‌سه‌ركردنی كراوه‌.

بۆ یه‌كه‌مجار ڤایرۆسی كۆرۆنای نوێ له‌ ١٩ی شوباتدا له‌ ئێران بڵاوبووه‌وه‌ و پاشان به‌ته‌واوی ئه‌و وڵاته‌دا بڵاوبوویه‌وه‌.

بەپێی دوایین ئامار ٩٠ هه‌زار و ٤٨١ کەس لە ئێران تووشی ڤایرۆسی كۆرۆنای نوێ بوون کە پێنج هه‌زار و ٧١٠یان گیانیان له‌ده‌ستداوە، ٦٩ هەزار و ٦٥٧یان چاکبوونەتەوە و ١٥ هەزار و ١١٤یان چارەسەر وەردەگرن.
زۆرترین بینراو
© 2024 Awene Online, Inc. All Rights Reserved.
×