مەحمود ڕەزا رایدەگەیەنێت ، قوتابخانەی سیاسی بارزانی ، شکستی هێناوە لە ئیدارەدان و دەشڵێت ئەگەر مەسرور بارزانی شۆرشێک بەسەر بنەماڵەکەیدا نەکات هیچی پێناکرێت.
ئاوێنە: مەحمود ڕەزا، ئەندامی خولی پیشووی ئەنجومەنی نوێنەرانی عێراق لە سەر لیستی گۆڕان لەمیانی گفتوگۆیەکیدا لەگەڵ رادیۆی دەنگی ئەمریکا رایگەیاند ، "قوتابخانەی سیاسی بارزانی فەشەلی هێناوە لە ئیدارەدان و ئەگەر ئەم قوتابخانەیە بەخۆیدا نەچیتەوە هیچی پێناکرێت".
دەشڵێت میللەتی کورد دەمێکە بەدەست کێشە و ململانێکانی ناو بنەماڵی بارزانیەوە دەناڵێنێت و رایدەگەیەنێت " هەر لەسەر دەمی مەلا مستەفاوە ئەم ململانێیانە هەیە و هەمووکات میللەت باجی ململانێکانی نێوان ئەم بنەماڵەیە دەدات "
مەحمود ڕەزا داوا لە موسرور بارزانی دەکات کە شۆرشێک بەسەر بنەماڵەکەیدا بکات و دەڵێت " ئەگەر ئەم کورە (مەسرور بارزانی) شۆرشێک بەسەر بنەماڵەکەیی خۆیدا نەکات هیچی پێناکرێت"
مەحمود ڕەزا باس لەوەش دەکات کە ئەمانە هەموو دەستکەوتی گەلی کورد بۆ بنەماڵەکەی خۆیان دەگەڕیینەوە ، بۆیە بەم ئەقڵیەتەوە ناتوانێت چاکسازیی کات و خێر بداتەوە.