عێراق ماوەی راگرتنی گەشتە ئاسمانییەكانی درێژكردەوە
  2020-06-06       1501       

ده‌سه‌ڵاتی فڕۆکه‌وانی شارستانی عێراق ماوەی ڕاگرتنی گه‌شته‌ ئاسمانییه‌کانی تا کاتێکی نادیار درێژكردەوە.

ئاوێنە: بەپێی راگەیەندراوێكی فڕۆكەخانەی نێودەوڵەتی سلێمانی، ئەمڕۆ شەممە، لە ئاگادارینامەیەکدا ده‌سه‌ڵاتی فڕۆکه‌وانی شارستانی عێراق بڕیاری ماوەی ڕاگرتنی گەشتە ئاسمانییەکانی لە سه‌رجه‌م فڕۆکه‌خانه‌کانی عێراق تا کاتێکی نادیارو ئاگادارکردنەوەیەکی تر راگەیاند.

‌بەپێی راگەیەندراوەكە، بڕیاره‌که‌ گه‌شتی فڕۆکه‌کانی مانگى سورو سەربازى و يارمەتییە تەندروستييەكان و فریاگوزارییەکان و بارهه‌ڵگر(کارگۆ) ناگرێته‌وه.

هێمای بۆ ئەوەش كردوە كە ‌ده‌رچواندنی بڕیاره‌کەی ده‌سه‌ڵاتی فڕۆکه‌وانی شارستانی عێراق بەهۆی مەترسیداری بارودۆخی ‌ بڵاوبونه‌وه‌ی ڤایرۆسی کۆرۆنایە کە ئەمەش له‌چوارچێوه‌ی رێگریکردنه لە بڵاوبونەوەی زیاتری ڤایرۆسەکە.

دەسەڵاتی فڕۆكەوانی شارستانی عێراق بۆ چەند جارێك ماوەی راگرتنی گەشتە ئاسمانییەكانی درێژكردۆتەوە كە بەرلەمە لە رۆژی 30ی ئایار بڕیاریدابو بە درێژكردنەوەی ماوەی راگرتنی گەیشتە ئاسمانییەكان تا سبەی یەكشەممە 7ی حوزەیران.

زۆرترین بینراو
© 2024 Awene Online, Inc. All Rights Reserved.
×