2020-06-07 533
ئۆپێك داوا لە عێراق و نێجیریا دەکات لەمانگی تەممووز تاوەکو ئەیلوولی ئەمساڵ بەرھەمھێنانی نەوتی خۆی زۆر کەم بکاتەوە، چونكە لەماوەی رابردوو نەوتی زیاتریان بەرهەن هێنابوو كاریان بەڕێككەوتنی ئۆپیك نەكردبوو.
ئاوێنه: وڵاتانی ئەندامی ئۆپێک کە لەلایەن سعودیەوە سەرۆکایەتی دەکرێت رۆژی (شەممە، 6-6-2020) کۆبوونەوە و بڕیاریان دا درێژە بە بڕیاری پێشوویان بدەن کە تایبەت بوو بە کەمکردنەوەی ئاستی بەرهەمهێنانی نەوت.
وڵاتانی بەشداری کۆبوونەوەکە داوایان کرد: ھەریەک لە عێراق و نێجیریا کە مانگی پێنج و شەشی ئەمساڵ پابەند بە بڕیاری کەمکردنەوەی بەرهەمهێنانی نەوت نەبوون، بۆ سێ مانگی داهاتوو دەبێت زیاتر لە وڵاتانی دیکە بەرھەمھێنانی نەوتی خۆیان کەمبکەنەوە.
لەکاتێکدا وڵاتانی جیهان بەرەبەرە رێکارەکانی قەدەغەی هاتووچۆ ئاسان دەکەن، کە ناچاربوون بۆ رێگریکردن لە تەشەنەسەندی پەتای کۆرۆنا پەیڕەوی بکەن، جوڵە دەکەوێتەوە بازاڕ، بەم ھەنگاوەش نرخی نەوت بۆ سەرووی 40 دۆلاری ئەمریکی بەرزبووەتەوە.
سعودیە، رووسیا و وڵاتانی دیکەی بەرھەمێنەری نەوت لە کۆبوونەوەکە رێککەوتن تاوەکو کۆتایی ئەم مانگە لە کەمکردنەوەی بەرھەمھێنانی نەوت بەردەوامبن، بەپێی رێککەوتنەکەشیان هەموو وڵاتەکان رۆژانە تێکڕای نۆ ملیۆن و 700 هەزار بەرمیل نەوت کەمدەکەنەوە، ئامانج لەو بڕیارەش بەرزکردنەوەی نرخی نەوتە بۆ سەرووی 50 دۆلاری ئەمریکی.