مستەفا کازمی، سەرۆك وەزیرانی عێراق رایگەیاند: گفتوگۆی ستراتیژیی نێوان عێراق و ئەمریکا کە ئێوارەی ئەمڕۆ پێنجشەممە، دەستی پێكرد، پشت دەبەستێت بە بۆچونی مەرجەعییەت و پەرلەمان و پێویستیی عێراق. ئاماژەی بەوەشکرد کە پارەی لێبڕدراوی موچەی خانەنشینان دەگەڕێننەوە.
ئاوێنە: مستەفا کازمی لە کۆنگرەیەکی رۆژنامەوانییدا باسی لە چەند پرسێک پەیوەست بە دۆخی ئابوری، موچەی فەرمانبەران و خانەنشینان و گفتوگۆی ستراتیژیی نێوان وڵاتەکەی و ئەمریکا، کرد.
کازمی باسی لە موچەی خانەنشیان کرد کە لەچوارچێوەی پلانی چاکسازیی دارایی بەشێک لە موچەکانیان بڕدرا، ئەمەش کاردانەوەی بەدوای خۆیدا هێنا و لەمبارەیە ئاماژهی بهوهكرد، کە لێبڕینەکان بەهۆی نەبونی نەختینەوە بوە و وتی: "لەسەدا ٧٣ی خانەنشینان موچەی تەواویان وەرگرتوە و لێبڕینەکان بەهۆی نەبونی نەختینەوە بو".
راشیگەیاند "تەنها لە سەدا ٢٧ خانەنشینان کە موچەیان وەرگرتوە لێبڕین لە موچەیان کراوە و لە چەند رۆژی داهاتودا یان لەگەڵ موچەی مانگی داهاتودا ئەو بڕە پارەیەیان بۆ دەگەڕێنرێتەوە".
سەرۆکوەزیرانی عێراق لەبارەی حکومەتەکەیەوە وتی"تەمەنی راستەقینەی حکومەتەکەم حەوت رۆژە چونکە هەفتەی رابردو تەواوکرا".
ئاماژەی بەوەشکرد کە لە عێراق شتێک بەناوی ئابوری بونی نییە، ئەوەی دەبینرێت تەنها پشت بەستن بە نەوت بوە."
راشیگەیاند: "ئامانجی حکومەتەکەم زەمینەسازییە بۆ ئەنجامدانی هەڵبژاردنێکی بێگەرد و پاراستنی ئابورییە لە داڕمان و پارێزگارییە لە شکۆی دەوڵەت".
مستەفا کازمی باسی لە گفتوگۆی ستراتیژیی نێوان وڵاتەکەی و ئەمریکای کرد و تیشكی خستهسهر ئهوهی، خواستی ئەوان ئەوەیە کە عێراق نەبێتە شوێنی ململانێکان و وتی: "گفتوگۆی ستراتیژیی نێوان عێراق و ئەمریکا کە ئەمڕۆ دەست پێدەکات، پشت دەبەستێت بە بۆچونی مەرجەعییەت و پەرلەمان و پێویستیی عێراق".