2020-06-22 496
.jpg)
وتەبێژی فەرماندەی گشتیی هێزە چەكدارەكان رایگەیاند، بەیانی ئەمڕۆ دووشەممە، قۆناغی سێیەمی ئۆپەراسیۆنی “پاڵەوانەكانی عێراق”، بە ئامانجی پشكنین و پاكسازیكردنی ژمارەیەک ناوچە لە سنووری پارێزگای سەڵاحەددین لە سێ محیوەرەوە دەستی پێ كرد.
ئاوێنه: لەراگەیەندراوێکدا عەمید یەحیا رەسوڵ، وتەبێژی فەرماندەی گشتیی هێزە چەكدارەكان رایگەیاندووە، “لەسەر فەرمانی سەرۆكوەزیران و فەرماندەی گشتیی هێزە چەكدارەكان، مستەفا كازمی و بە سەرپەرشتی فەرماندەیی ئۆپەراسیۆنە هاوبەشەكان، بەیانی ئەمڕۆ دووشەممە، قۆناغی سێیەمی ئۆپەراسیۆنی ‘پاڵەوانەكانی عێراق’ بە ئامانجی پشكنین و پاكسازیكردنی ژمارەیەک ناوچە لە سنووری پارێزگای سەڵاحەددین لە سنووری یەكلاكەرەوە لەگەڵ فەرماندەیی ئۆپەراسیۆنەكانی (دیالە، سامەڕا و كەركووك) دەستی پێ كرد”.
هاوکات عەمید یەحیا رەسوڵ ئاماژەی بەوەیش داوە، ئۆپەراسیۆنەكە لە سێی میحوەرە دەستی پێكردووە كە هێزەكانی فەرماندەیی ئۆپەراسیۆنەكانی سەڵاحەددین، سامەڕا و دیالە، هێزەكانی فیرقەی نۆی زرێپۆش، هێزەكانی كۆماندۆ سەربە وەزارەتی ناوخۆ، هێزەكانی پۆلیسی فیدرال، هێزەكانی بەرپەرچدانەوەی خێرا و سوات و هێزەكانی پۆلیسی فیدرال سەربە فەرماندەیی ئۆپەراسیۆنە هاوبەشەكان لە كەركووك تیایدا بەشداری دەكەن.
وتەبێژی فەرماندەی گشتیی هێزە چەكدارەكان باسی لەوەیش كردووە كە هێزەكانی حەشدی شەعبی لە سەڵاحەددین، دیالە، سامەڕا و كەركووك لە پۆپەراسیۆنەكەدا، بەشدارن.
بەپێی راگەیەندراوەكە لە میانی ئۆپەراسیۆنەكەدا، پشتیوانی لەلایەن فڕۆكەكانی سوپا و فڕۆكەكانی هاوپەیمانییەتی نێودەوڵەتی دژبە داعش دابینكراوە.
باس لەوەیش كراوە كە ئامانج لە ئەنجامدانی ئۆپەراسیۆنەكە، پشكنین و پاكسازكردنی رووبەری چوار هەزار و ٨٣٥ كیلۆمەتر چوار گۆشەیە، هەروەها راوەدوونانی تیرۆریستانی داعش و كەسانی داواكراوە.
لە ماوەكانی رابردوودا، قۆناغی دووەمی ئۆپەراسیۆنی “پاڵەوانەكانی عێراق”، بە ئامانجی راوەدوونانی تیرۆریستانی داعش لە پێنج میحوەری باشووری رۆژئاوای كەركووك ئەنجامدرابوو كە لە میاندا، ژمارەیەك تیرۆریستی داعش كوژراون و ژمارەیەك حەشارگەیش خاپووركران.