ئەندامێکى خانەى راپەڕاندنى گۆڕان رایدەگەیەنێت؛ لە سەرەتای هەفتەی داهاتوەوە سەردانی لایەنە سیاسییەکان دەکەن بۆ تاوتوێکردنی دۆخی ئێستاو دوایین گۆڕانکارییەکان.
ئاوێنە: دەرباز محەمەد، ئەندامی خانەی راپەڕاندنی بزوتنەوەی گۆڕان رایگەیاند؛ لە هەفتەی داهاتوەوە سەردانی کۆمەڵی ئیسلامی و یەکگرتوی ئیسلامی و پارتی دیموکراتی کوردستان دەکەن بۆ تاوتوێکردنی بۆچونی لایەنەکان و گۆڕانکارییەکان ئێستا و دۆخی سیاسی.
وتیشی: دەمانەوێت پلانی ساڵی داهاتو ئامادە بکەین بۆ چۆنیەتی مامەڵەکردن لەگەڵ گۆڕانکارییەکان.
سەبارەت بە دانوستانەکانیش لەگەڵ بەغدا، ئەو ئەندامەی خانەی راپەڕاندن رونیکردەوە، حکومەتی عێراق و هەرێم سورن لەسەر ئەوەی بەرەو رێککەوتن بڕۆن و لەروی سیاسیشەوە کەشەکە لەبارە، بەڵام لە وردەکارییەکاندا کێشە هەیەو ئەگەر ئەو گرفتانە چارەسەر بکرێن، دەکرێت بگەنە رێککەوتن.