فەرماندەیی ئۆپەراسیۆنە هاوبەشەكانی عێراق سەبارەت بە بۆردومانەكەی ئێوارەی ئەمڕۆی سەیرانگای كونەماسی لەناوچەی شارباژێری سەربە پارێزگای سلێمانی، رایگەیاند: چاوەڕێین زانیاریی تەواومان لەسەر هێرشەكە بگاتە دەست بۆ ئەوەی هەڵوێستی خۆمانی لەبارەوە رابگەیەنین.

ئاوێنە: تەحسین خەفاجی، وتەبێژی فەرماندەیی ئۆپەراسیۆنە هاوبەشەكانی عێراق، لە لێدوانێكدا رایگەیاند: چاوەڕێین زانیاری تەواومان لەسەر بۆردومانەكە بگاتە دەست سەبارەت بەوەی فڕۆكەكە لەكوێرە هاتوەو زیانەكانی بۆردومانەكە چی بون.

وتوشیەتی"ئیمە لە پەیوەندی بەردەوامداین لەگەڵ هێزەكانی پێشمەرگە بەو سیفەتەی ئەوان بەرپرسن لە ئاسایشی ئەو ناوچەیە."

ئەوەشی خستۆتەڕو"لەسەر بنەمای ئەو زانیارییانەی دەگەنە دەستمان هەڵوێستمان لەسەر روداوەكە دەبێت"

بەپێی قسەی قائیمقامی چوارتا، لەو بۆردومانەدا یەك كەس شەهید بوە كە "چەكدار" بوەو هەروەها شەش كەسی دیكەش برینداربون و بۆردومانەكەش بە قسەی ئەو لەلایەن فڕۆكەیەوە ئەنجام دراوە.

بەپێی میدیاكانی نزیك لە پەكەكە، ئەو فڕۆكەیەكی بۆردومانەكەی ئەنجامداوە، توركی بوە.