نوری مالیكی، سەرۆكی ئیئتیلافی دەوڵەتی یاسا، رەخنە لە هەڵكوتانە سەر بارەگای حزبی دەعوەی سەر بە هێزەكانی حەشدی شەعبی لەلایەن هێزی دژە تیرۆری عێراقی دەگرێت و دەڵێت: نابێت دەستدرێژی بكرێتە سەر حەشدی شەعبی.

ئاوێنە: شەوی رابردو هێزێكی دژە تیرۆری عێراق، هەڵیكوتایە سەر بارەگایەكی حزبوڵای عێراق سەربە هێزەكانی حەشدی شەعبی لە بەغداو چەند كەسێكی لێ دەستگیركردن و لەبەرامبەردا هێزەكانی حزبوڵا لە ناو بەغدا بڵاوەیان پێكراو هەڕەشەیان لە ئەنجامدەرانی ئەو كردەوەیە كرد.

لەبارەی ئەو روداوەوە، نوری مالیكی، ئەمڕۆ هەینی، لە تویتێكدا رایگەیاند"حەشدی شەعبی فەرماندەی سەركەوتن و ناونیشانی هیزی گەل و دەوڵەتەو دەبێت رێزی لێبگرین و شكۆی بپارێزین و نابێت دەستدرێژی بكرێتەسەرو بەكەم بگیرێت."

مالیكی وتوشیەتی"دەوڵەت دەوڵەتی ئێمەیە، هێزەكانی دژە تیرۆریش رۆڵەی ئێمەن كە شانازی بە هەوڵ و قارەمانێتییەكانیان دەكەین و نابێت بە كەم وەربگیرێن و هەر هێزێكی نیشتمانیش هی دەوڵەتە."

سەرۆكی ئیئتیلافی دەوڵەتی یاسا داوای لە هەموان كردوە دان بەخۆیاندا بگرن و بەپەرۆش بن بۆ چارەسەركردنی كێشەكان بە نەفەسێكی نیشتمانی و بەرپرسیارانەو دور لە رق و كینەو دەستوەردانی دەرەكی.

هەروەها داواشی لە چەكداران و حكومەت كردوە ئاگاداری ئەوانە بن كە دەیانەوێت ناكۆكی دروست بكەن لەنێوان هاوخەمانی نیشتماندا.