وتەبێژی دەزگای دژە تیرۆری عێراق ڕەتیکردوە هێزەکانیان بەشداریان لە هیچ کردەیەکی سەربازی کردبێت لە هەرێمی كوردستان دەشڵێت، کۆنتڕۆڵکردنی دەروازە سنورییەکان ئەرکی ئەوان نییەو ئەوەشی لەڕاگەیاندنەکان باسدەکرێت سەبارەت بەو پرسە دورە لە ڕاستییەوە.

ئاوێنە: سەباح نوعمان، وتەبێژی دەزگای دژە تیرۆری عێراق بە "ناس کورد"ى وت"هێزەکانمان بەشداریان لە هیچ ئۆپڕاسیۆنێکی سەربازی لە ناوچەکانی ژێر دەسەڵاتی حکومەتی هەرێمی کوردستاندا نەکردوە." 

وتیشی"دەزگای دژە تیرۆری عێراق هەماهەنگی تەواوی لەگەڵ لایەنە ئەمنییەکانی هەرێمی کوردستاندا هەیە، ئەوەش لەڕێگەی نوسینگەکانمانەوە لەهەرێمی کوردستان."

دەرەبارەی پرسی کۆنترۆڵکردنی دەروازە سنورییەکان لەلایەن ئەو هێزانەوە، نوعمان وتی"ئێمەش وەک ئێوە ئەو دەنگۆیانەمان لە دەزگاکانی ڕاگەیاندن و تۆڕە کۆمەڵایەتییەکاندا بیستوە، تائێستا هیچ بڕیاڕێکمان لەو باریەوە لە حکومەتەوە پێنەگەیشتوە." 

وتەبێژەکەی دەزگای دژە تیرۆری عێراق، جەختیشلەوە کردەوە، ئەرکی هێزەکانی ئەوان تەنها قەڵاچۆکردن و بنبڕکردنی تیرۆر و شکستهێنانە بە کردەوە تیرۆرستیەکان، نەك کۆنتڕۆڵکردن و پاراستنی دەروازە سنورییەکان.