لە كۆبونەوەی ئەمڕۆ (پێنجشەممە)ی جڤاتی نیشتمانی بزوتنەوەی گۆڕاندا، عەدنان عوسمان سكرتێری جڤاتی نیشتمانی بە وتەبێژی رەسمی بزوتنەوەكە دیاریكرا.
ئاوێنە: سەرلەبەیانى ئەمڕۆ پێنجشەممە کۆبونەوەى جڤاتى نیشتیمانى بزوتنەوەى گۆڕان بە سەرپەرشتى عومەر سەید عەلى، رێکخەرى گشتى بزوتنەوەى گۆڕان دەستیپێكرد كە تیایدا گفتو لەبارەى دۆخى ژیانى خەڵک و پرسى چاکسازى و هەڵسەنگاندن بۆ کارى حکومەت کرا و تاوتوێى ئەو قەیرانانەشکرا کە روى لە هەرێمى کوردستان کردوە.
بەپێى میدیای رەسمی گۆڕان، لە کۆبونەوەکەدا كە كەمێك لەمەوبەر كۆتایی هاتوە، عەدنان عوسمان، سکرتێرى جڤاتى نیشیمانى و ئەندامى خانەى راپەڕاندن وەک وتەبێژى رەسمی بزوتنەوەى گۆڕان دیاریکرا و بڕیارە پاش کەمێکى دیکەش راگەیەندراوێک لەبارەى ناوەڕۆکى کۆبونەوەکە بڵاوبکرێتەوە.