2020-07-11   1446     
بە بڕیاری مستەفا کازمی سەرۆک وەزیران و بەرپرسی گشتی هێزە چەکدارەکانی عێراق، بەیانی ئەمڕۆ قۆناغی چوارەمی ئۆپراسۆنی پاڵەوانانى عیراق لە دیالە دەستیپێکرد و دژە تیرۆری سلێمانی’ش لە ئۆپراسیۆنەکەدا بەشدارە.
ئاوێنه: عەمید یەحیا ڕەسوڵ، وتەبێژی سوپای عێراق لە بەیاننامەیەکدا ڕایگەیاند، بە بڕیاری ستەفا کازمی بە درێژایی سنووری ئێران لە پارێزگای دیالە، قۆناغی چوارەمی ئۆپەراسیۆنی دژ بە پاشماوەکانی داعش دەستیپێکردووە.
ئۆپەراسیۆنەکە تەواوی ئەو ناوچانەش دەگرێتەوە کە دەکەوێتە نێوان سنووری هێزی پێشمەرگە و سوپای عێراقەوە، تیایدا فڕۆکەی هاوپەیمانی نێودەوڵەتی و چەکی قورس بەکاردەهێنرێ و ڕووبەری ١٧ هەزار و ٦٨٥ کیلۆمەتر دووجا پاک دەکرێتەوە.
عەبدولئەمیر کامیل شمەری، جێگری فەرماندەی ئۆپراسیۆنە هاوبەشەکانی عێراق ڕایگەیاند، ئۆپەراسیۆنەکە هەریەک لە فەرماندەی ئۆپەراسیۆنەکانی سەلاحەدین و سامەرا، پۆلیسی فیدراڵی، هێزەکانی بەرپەرچدانەوەی خێرا، حەشدی شەعبی و لیواکانی هێزی تایبەت، لیوای هەشتی هێزی پاسەوانی سنوور، دژە تیرۆر، فەرماندەی ئۆپراسیۆنی تایبەتی دوو، لەگەڵ هێزی دژە تیرۆری سلێمانی و پۆلیسی پارێزگای دیالە و هێزی هاوپەیمانان بەشدارن.
ئۆپراسیۆنەکە لە چوار میحوەرەوە لە ناوچەکانی باکوری و باشوری خانەقین ھەروەھا لە ناوچەی قەرەتەپە وباکور گوڵاڵە دەستی پێکردووە.