بەرهەم ساڵح،
سەرۆك كۆماری عێراق، ئەمڕۆ یەكشەممە، لە سلێمانی پێشوازیكرد لە سەڵاحەدین بەهادین،
ئەمینداری گشتی یەكگرتوی ئیسلامی و باسیان لەچەند پرسێك كرد، لەوانە چارەسەركردنی کێشە
ھەڵپەسیردراوەکانی نێوان بەغداو هەرێم لە سەر بنەمای دەستور.
ئاوێنە: بەپێی راگەیەندراوێكی
سەرۆكایەتی كۆماری عێراق، ئەمڕۆ یەكشەممە، بەرھەم ساڵح لە شاری سلێمانی پێشوازیکرد
لە سەڵاحەدین بەھادین، ئەمینداری گشتی یەکگرتوی ئیسلامی کوردستان و سەبارەت بە دوا
پێشھاتە سیاسییەکانی کوردستان و عێراق و ناوچەکە گفتوگۆیان کرد.
لە دیدارەکەدا جەختکرایەوە
لە پێویستی ھەمەھانگی نێوان گشت لایەنە سیاسییەکان لەپێناو چارەسەرکردنی کێشەو قەیرانەکان،
لە رێگای دیالۆگ و لێکگەیشتن بە ئاڕاستەی بەرژەوەندی خەڵک و پرۆسەی سیاسی و ھێنانەکایەوەی
ئاسایش و ئارامی و خۆشگوزەرانی بۆ ھاوڵاتیانی عێراق و ھەرێمی کوردستان.
لە بەشێکی دیکەی
دیدارەکەدا بەگرنگییەوە باس لە چارەسەرکردنی کێشە ھەڵپەسیردراوەکانی نێوان ھەردو
حکومەتی ھەرێمی کوردستان و حکومەتی فیدڕاڵی کرا، لە سەر بنەمای دەستور، بەتایبەتی
پرسی یەکلاییکردنەوەی بودجەو موچەی موچەخۆرانی ھەرێمی کوردستان و پاراستنی مافی ھاوڵاتیانی
کوردستان و موچەخۆران و بژێوی خەڵک.