دادگای لێكۆڵینەوەی هەولێر فەرمانی دەستگیركردنی بۆ سۆران عومەر، پەرلەمانتاری كۆمەڵی ئیسلامی لە پەرلەمانی كوردستان، دەركرد.

ئاوێنە: دادگاكە، ئەمڕۆ یەكشەممە 12/07/2020 لە یاداشتێكی دەستگیركردندا كە ئاڕاستەی گشت ئەندامانی بەرزەفتی دادوەری و گشت ئەندامانی پۆلیس كراوە، رایگەیاندوە: ئێوە رێگەتان پێدراوەو لەسەرتانە تۆمەتبار سۆران عومەر سەعید، پەرلەمانتاری كوردستان، دەستگیربكەن و بیدەن بە دادگاكەمان چونكە لەبنكەی پۆلیسی خانەقا سكاڵای لەسەر تۆماركراوە.

لە 7ـی مانگی ئایار بە دەنگی 57 پەرلەمانتار پارێزبەندیی سۆران عومەر، ئەندامی پەرلەمانی کوردستان هەڵگیرا.

دواتر رۆژی 15-6-2020 سەرۆکی پەرلەمانی کوردستان ئەو بڕیارەی هەڵوەشاندەوە. 

فرسەت ئەحمەد، وەزیری دادی ھەرێمی كوردستان لەنوسراوێكدا وەڵامی بڕیاری رێواز فایەق، سەرۆکی پەرلەمانی کوردستانی دایەوە سەبارەت بە هەڵوەشاندنەوەی هەڵگرتنی پارێزبەندیی لەسەر پەرلەمانتار سۆران عومەر و وتی "بڕیارەکە پێچەوانەی رێسای گشتی پلەبەندی یاسایی دەرچوە" و لە رۆژنامەی وەقائیع بڵاونابێتەوە.

وەڵامەكەی وەزیری داد بۆ سەرۆكی پەرلەمانی كوردستان رەخنەی لێگرا، لەو بارەیەوە ئینستتیوتی پەی بۆ پەروەردەو گەشەپێدان نوسراوەكەی بە "نایاسایی" ناوبردو رایگەیاند: بەپێی یاسا وەزارەتی داد بۆی نیە نوسراو راستەوخۆ ئاراستەی سەرۆكایەتی پەرلەمان بكات، بەڵكو دەبوایە بەڕێكاری خۆی لەرێگەی ئەنجومەنی وەزیرانەوە وەڵامی بدایەتەوە و رەچاوی پلەبەندی كارگێڕیی بكردایە.