د. سەباح هەورامی، بەڕێوەبەری گشتی تەندروستی سلێمانی رایگەیاند: شەپۆلی كۆرۆنا لە سلێمانی بەرەو ئارامبونەوە دەچێت و هاوڵاتیان لە داهاتودا هەواڵی دڵخۆشكەر لەوبارەیەوە دەبیستن.
ئاوێنە: د. سەباح هەورامی، بەڕێوەبەری گشتی تەندروستی سلێمانی، ئێوارەی ئەمڕۆ دوشەممە، لە راگەیەندراوێكی كورتدا وتی"شەپۆلی کۆرۆنا لە سلێمانی بەرەو ئارامبونەوە دەچێت."
وتوشیەتی"ئەگەر هاوڵاتیان خۆپارێزی بکەن لە داهاتودا هەواڵی دڵخۆشکەر سەبارەت بە ئامارەکانی کۆرۆنا دەبیستن."
ئەوەش لەكاتێكدایە كە ئامارەكانی كۆرۆنا لە سلێمانی بەرەو كەمبونەوە دەچن و هەر دوێنێ بەڕێوەبەری گشتی تەندروستی سلێمانی وتبوشی: لە ماوەی دو هەفتەی رابردودا (١٩٩٠) توشبوی كۆرۆنا لە شاری سلێمانی چاکبونەتەوەو لە ١٣/٥/٢٠٢٠ تا دوێنێ (٢٨٥٧) کەس چاکبونەتەوە.
هەر دوێنێ عەبدوڵا ئەحمەد، جێگری بەڕێوەبەری تەندروستی سلێمانی رایگەیاندبو كە رۆژی یەكشەممە كەمترین ئاماری مردن بە كۆرۆنا لە سلێمانی تۆماركراوە كە دو كەس بون.