2020-07-13 392
ئه‌ڤرو سپێدێ 13/7/2020 پارێزگه‌رێ دهۆكێ سه‌رپه‌رشتیا كۆمبوونه‌كا تایبه‌ت دگه‌ل تیمێ سندوقا په‌ره‌پێدانا كۆمه‌ڵایه‌تی لقێ دهوك كر بۆ ئەنجامدانا چەندین پرۆژەیان ل سنۆرێ دهۆکێ بهێنە ئەنجامدان.
ئاوێنە، وارهێل نێروەیی: د. عەلی تەتەر، پارێزگەرێ دهۆکێ دكۆنگره‌كێ رۆژنامه‌ڤانیدا راگەهاند: ئه‌ڤرۆ مه سه‌رپه‌رشتیا كۆمبوونه‌كێ دگه‌ل تیمێ سندوقا په‌ره‌پێدانا كۆمه‌ڵایه‌تی لقێ دهوك كر ژبوو ده‌ست نیشانكرن و بجهئینانا ژماره‌كا پرۆژێن خزمه‌تگۆزاری ل گوندێن سنورێ قه‌زا وناحیێن پارێزگه‌هێ و خه‌لكێ زێدەتر ژ 10 گوندان دێ مفای ژڤان پرۆژان وه‌رگریت، گوت ژی: ئه‌ڤ به‌رنامه دێ بو ماوێ (5) ساڵا به‌رده‌وام بیت لڤان پێنچ ساڵا پتری (50) گوندا دێ مفای بینن.
ئاشکرا ژی کر: ئه‌ڤ پروژه ب رێكا جڤاتێن گوندا و ب هه‌ماهه‌نگی دگه‌ل كارگێریا پارێزگه‌هێ وتیمێ سندوقا په‌ره‌پێدانا كۆمه‌ڵایه‌تی لقێ دهوك دێ هێنه ده‌ست نیشانكرن. پروژێن ساڵا ده‌ربازبوی ل سنورێ قه‌زایێن دهوك وسمێل وئامێدیێ وشێخان هاتبونه بجهئینان وبو ئه‌ڤ ساڵه ژماره‌كا خه‌لكێ گوندێن قه‌زایێن ئامێدیێ وئاكرێ وبه‌رده‌ره‌ش وزاخو دێ مفای ژێ وه‌رگرن.
سه‌باره‌ت پروژێن حكومه‌تا هه‌رێما كوردستانێ یێن نه‌تومامكری گۆت: سه‌روكێ حكومه‌تا هه‌رێما كوردستانێ رێزدار مه‌سرور بارزانی یێ رژده كو هه‌موو پرۆژێن نیڤه‌رو بهێنه تومامكرن تایبه‌ت پرۆژێن ستراتیجی وه‌كو فروكخانا دهوك وتونێلێن ده‌ڤه‌رێ وئه‌م ژی دێ ب هه‌موو شیانا كاری ل سه‌ر وان پروژا كه‌ین.
هه‌ژی گوتنێ یه ل دووڤ به‌رنامێ سندوقا په‌ره‌پێدانا كۆمه‌ڵایه‌تی لقێ دهۆك ل ئه‌ڤ ساڵه( 23)پرۆژێن نوو ل قه‌زایێن ئامێدیێ وئاكرێ وبه‌رده‌ره‌ش وزاخو دێ هێنه ئه‌نجامدان نێزیكی 17 گوندێن وان ده‌ڤه‌را دێ مفای ژێ وه‌رگرن پروژه دبیاڤێ ئاڤ وكاره‌ب ورێك وپه‌روه‌ردێ دانه بهایێ وان (3) ملیار دینارن ب پشته‌ڤانیا وه‌زاره‌تا پلان دانانا عیراقێ ژقه‌رێن بانكا نیڤ ده‌وله‌تی پشكا پارێزگه‌ها دهوكێ هاتینه دابینكرن .