2020-07-14   503     
راوێژكاری نوێی ئاسایشی نیشتمانیی عێراق دوای دەستبەکاربوونی رایگەیاند، “هەوڵی زیاتر بۆ خزمەتكردنی بەرژەوەندی گشتیی دەخەینەگەڕ”.
ئاوێنه: بەیانی ئەمڕۆ سێشەممە ١٤ی تەمموز ٢٠٢٠، لە رێورسمێكدا لە باڵەخانەی راوێژكاری ئەنجوومەنی ئاسایشی نیشتمانیی عێراق بەڕێوەچوو، تیادا پۆستی راوێژكاری ئەنجوومەنەكە لەلایەن فالح فەیازەوە رادەستی قاسم ئەعڕەجی كرا.
هاوکات نووسینگەی راگەیاندنی راوێژكاری ئەنجوومەنی ئاسایشی نیشتمانیی عێراق بڵاوی كردەوە كە دوای رێورەسەكە، قاسم ئەعڕەجی لە پۆستی راوێژكاری نوێی ئاسایشی نیشتمانیی عێراق دەستبەكاربووە و دواترلەگەڵ بەڕێوەبەری بەشەکانی دامەزراوەی راوێژكاری ئەنجوومەنی ئاسایشی نیشتمانیی كۆبووەتەوە.
بەپێی نووسینگەکە لە كۆبوونەوەكەدا، راوێژكاری نوێی ئاسایشی نیشتمانیی عێراق رایگەیاندووە كە هەوڵی زیاتر بۆ خزمەتكردنی بەرژەوەندی گشتیی دەخەنەگەڕ.
لە چواری ئەم مانگە مستەفا كازمی، فەرماندەی گشتیی هێزە چەكدارەكان و سەرۆكوەزیرانی عێراق كۆتایی بە ئەركی فالح فەیاز وەك راوێژكاری ئاسایشی نیشتمانیی هێنا و وەزیری پێشووی ناوخۆ، قاسم ئەعرەجی بۆ راوێژكاری ئاسایشی نیشتمانیی راسپارد.