2020-07-16 496
وتەبێژی فەرمیی بەناوی فەرماندەی گشتیی هێزە چەکدارەکانی عێراق رایگەیاند، تیرۆریستی داعشی بەناو والی بەغدا سەربە رێکخراوی تیرۆریستیی داعشی کوژرا.
ئاوێنه: لە راگەیەندراوێکدا عەمید یەحیا رەسول، وتەبێژی فەرمیی بەناوی فەرماندەی گشتیی هێزە چەکدارەکانی عێراق کوژرانی بەناو والی بەغدا سەربە رێکخراوی تیرۆریستیی داعش، ناسراو بە عومەر شەلال عبێد-ی راگەیاند.
هاوکات عەمید یەحیا رەسول لە هەژماری خۆی لە تۆڕی کۆمەڵایەتیی تویتەر بڵاوی کردووەتەوە رایگەیاندووە، پشتبەستن بە زانیاری ورد، هێزەکانی سەربە دەزگای هەواڵگریی نیشتمانیی عێراق لە میانی ئۆپەراسیۆنێکی تایبەتدا، بەناو والی بەغدا سەربە رێکخراوی تیرۆریستی داعش، ناسراو بە عومەر شەلال عبێد و یاریدەرەکەی بۆ کاروباری راگەیاندن، لەیس جەمال ناسراو بە ئەبو بەرا کە هەڵگری رەگەزنامەی وڵاتیكی عەرەبییە، کوشتووە.
شایەنی باسە وتەبێژی فەرمیی بەناوی فەرماندەی گشتیی هێزە چەکدارەکانی عێراق راشیگەیاندووە کە پێشتر هێزەکانی سەربە دەزگای هەواڵگریی نیشتمانیی عێراق بەناو والی پێشووی بەغدا، تیرۆریست ئەحمەد عیسا ناسراو بە ئەبو تەڵحە-یان کوشتبوو کە دواتر عومەر شەلال عبێد جێگای گرتبووەوە.