لە سلێمانی رێكخراوەكان و چالاكانی كۆمەڵگای مەدەنیی داوا دەكەن، نرخی نۆرینگە پزیشكییەكان، سۆنەر و دەرمان كەم بكرێتەوە.
ئاوێنه: هیوا عەبدوڵا كە لەكۆنگرەیەكی رۆژنامەوانیدا بە ناوی "ئەنجوومەنی فشار" قسەی بۆ میدیاكاران كرد و وتی: "نرخەكان وەك ساڵانی پێشووە كە ئەو كات بارودۆخی دارایی باش بووە و مووچە هەبووە و بازاڕ جوڵەی تیادا بووە، بەڵام ئێستا دۆخەكە وا نییە و ئەوە گرانییە. مەبەستمان دژایەتیكردنی پزیشكان نییە، بەڵام بەرژەوەندی خەڵك ئەوەیە و دەبوایە بەرلە ئێمە پزیشكە بەڕێزەكان ئەو هەنگاوەیان نابا".
وتیشی: "سەردانی هەریەكە لە قایمقامی سلێمانی، لێژنەی تەندروستیی ئەنجوومەنی پاریزگای سلێمانی-مان كردووە، هەروەها لەگەڵ سەندیكای پزیشكانیش كۆدەبینەوە و لە هەولێریش سەردانی پەرلەمان دەكەین و لەگەڵ وەزیری تەندروستیی دادەنیشین".
رێبوار ئەحمەد، سەرۆكی لیژنەی تەندروستیی لە ئەنجوومەنی پارێزگای سلێمانی، وتی: "ئێمە وەك لێژنەی تەندروستیی لە ئەنجوومەنی پارێزگای سلێمانی لەو باوەڕەداین كە بەهێزكردنی كەرتی تەندروستیی گشتییە و پشتیوانی حكوومەت دەتوانێت یارمەتیدەری پزیشكان و كارمەندانی تەندروستیی بكات بۆ ئەوەی بە باشترین شێواز خزمەتی نەخۆشەكان بكەن و لەو كاتەدایە كە نەخۆش پێویستی بە كەرتی تەندروستیی تایبەت نابێت".
٦١ رێكخراوی كۆمەڵی مەدەنیی و زیاتر لە ٢٥٠ چالاكوان و كەسایەتی سنووری پارێزگای سلێمانی لە یادداشتێكدا كە ئاراستەی ئەنجوومەنی پارێزگای سلێمانی-یان كردووە، داوا دەكەن نرخی نۆرینگە پزیشكییەكان، سۆنەر و دەرمان كەم بكرێتەوە.