2020-07-22 741
بەڕێوەبەری گشتیی وەزارەتی بازرگانیی حكومەتی ھەرێمی كوردستان وتی، ئاڵوگۆڕی بازرگانیی نێوان ھەرێمی كوردستان و ھەردوو وڵاتی توركیا و ئێران بەردەوام لە زیادبووندایە و، ئەوەی توركیا گەیشتووەتەوە ئاستی پێش كۆرۆنا و لەگەڵ ئێرانیش پلان دانراوە بگاتە ٢٠ملیار دۆلار ساڵانە، بۆیە لە ئێستادا ساڵانە ئاڵوگۆڕی بازرگانی لەگەڵ ئەو دوو وڵاتەدا دەگاتە ١٦ملیار دۆلار.
ئاوێنه: نەوزاد ئەدھەم، بۆ ماڵپەڕی فەرمیی پارتی دیموكراتی كوردستان ڕایگەیاند: “دۆخی بازرگانی لە ھەرێمی كوردستان زۆر باش بووە و لە ئێستادا تەنھا جموجۆڵی بازرگانی لە نێوان عێراق و ئێران ١٢ملیار دۆلارە، كە تەنھا لەگەڵ ھەرێمی كوردستان چوار ملیار دۆلارە ساڵانە و، پلانیش دانراوە بگاتە ٢٠ملیار دۆلار”.
ئەدھەم وتیشی: “رۆژ بەڕۆژ ھەوڵ دەدرێت بۆ ئەوەی ئاستی بازرگانیی نێوان هەرێم و ئەو دوو وڵاتە زیاتر بێت، تا ئەوەی مەبەستمانە، بگاتە ئەو ئاستە”.
لەبارەی ئاڵوگۆڕی بازرگانی لەگەڵ توركیاش، ناوبراو روونی كردەوە: “لە ئێستادا ئاڵوگۆڕی بازرگانیی نێوان ھەرێمی كوردستان و توركیا گەیشتووەتە ئاستی پێش كۆرۆنا و ھەموو كەلوپەلێك ھاوردە دەكرێت، كە ساڵانە ئەویش نزیكەی ١٢ملیار دۆلارە”