ڤیدیۆ.. فڕۆكەیەكی جەنگی ئیسرائیل لە ئاسمانی سوریا فڕۆكەیەكی مەدەنی ئێرانی هەراسان دەكا
  2020-07-23       1660       

میدیای رەسمی ئێران بڵاویكردەوە فڕۆكەیەكی جەنگی ئیسرائیلی لە ئاسمانی سوریا فڕۆكەیەكی مەدەنی هێڵی ئاسمانی ماهانی ئێرانی هەراسان كردوەو بەوهۆیەوە هەندێك لە سەرنشینانی فڕۆكە ئێرانییەكە بریندار بون.

ئاوێنە: ئاژانسی هەواڵی رەسمی "سەداو سیما"ی ئێران بڵاویكردەوە، ئەمڕۆ پێنجشەممە، فڕۆكەیەكی هێڵی ئاسمانی ماهانی ئێرانی كە لە تارانەوە بەرەو بەیروت فڕیوە كاتێك گەیشتۆتە ئاسمانی سوریا، لەلایەن فڕۆكەیەكی ئیسرائیلییەوە هەراسان كراوەو فڕۆكە ئیسرائیلییەكە بەشێوەیەكی مەترسیدار لە فڕۆكە ئێرانییەكە نزیك بۆتەوە.

ئاماژەی بەوەشداوە كە بەوهۆیەوە، فڕۆكە مەدەنییە ئێرانییە بۆ رێگەگرتن لە بەركەوتنی لەگەڵ فڕۆكە ئیسرائیلییە، بەخێرایی نزم بۆتەوە كە ئەوەش بۆتە هۆی ئەوەی ژمارەیەك لە گەشتیارانی فڕۆكەكە بریندار ببن.

ئاژانسی رەسمی هەواڵی سەداو سیمای ئێران لەگەڵ ئەوەش نوسیویەتی هەندێك سەرچاوە باسیان لەوە كردوە كە فڕۆكە جەنگییەكە ئیسرائیلی بوەو هەندێكیش دەڵێن: ئەمریكی بوە.

 

زۆرترین بینراو
© 2021 Awene Online, Inc. All Rights Reserved.
×