كۆشكی سپی: هەڵبژاردن لە مانگی 11 ئەنجام دەدرێت
  2020-08-02       426       

گەورە بەرپرسێكی كۆشی سپی ئەمریكا رایگەیاند: رۆژی 3ی 11ی 2020 هەڵبژاردنی سەرۆكایەتی ئەمریكا بەڕێوەدەچێت، ئەوەش دوای ئەوەی دۆناڵد ترەمپ، سەرۆكی ئەو وڵاتە پێشنیاری دواخستنی هەڵبژاردنەكەی كردبو.

ئاوێنە: بەپێی ئاژانسی رۆیتەرز، ئەمڕۆ یەكشەممە، مارك مێدۆس، سەرۆكی كارمەندانی كۆشكی سپی، بە كەناڵی "سی بی ئێس"ی راگەیاندوە"رۆژی 3ی تشرینی دوەم هەڵبژاردن ئەنجام دەدەین و سەرۆك ترامپ هەڵبژاردنەكە دەباتەوە."

وتەكانی ئەو گەورە بەرپرسەی كۆشكی سپی دوای ئەوە دێن كە لە چەند رۆژی رابردودا، ترەمپ لە تویتێكدا پێشنیاری دواخستنی هەڵبژاردنە سەرۆكایەتییەكەی وڵاتی كردبو.

مارك مێدۆس وتوشیەتی: کاتێک دۆناڵد ترەمپ ئاماژەی بە بیرۆکەی دواخستنی هەڵبژاردن کردبو لە نیگەرانییەوە بو سەبارەت بە دەنگدان بە رێگای نامەی پۆستە.

رۆژی پێنجشەممەی رابردو، دۆناڵد ترەمپ لە تویتێكدا رایگەیاندبو: ئەگەر دەنگدان لەڕێگەی نامەی پۆستەوە بێت، ئەوا هەڵبژاردنی 2020، نادەقیقترین و پڕساختەترین هەڵبژاردن دەبێت لە مێژودا. ترامپ، ئەوەشی بە "سوكایەتی" بۆ ئەمریكا ناوبردبو.

سەرۆكی ئەمریكا پێشنیاری كردبو هەڵبژاردنەكە دوابخرێت تا ئەو كاتەی خەڵك دەتوانن بەشێوەیەكی سروشتی و متمانەپێكراو و  پارێزراو لە نەخۆشی كۆرۆنا، دەنگ بدەن.


زۆرترین بینراو
© 2021 Awene Online, Inc. All Rights Reserved.
×