بەرهەم ساڵح، سەرۆك كۆماری عێراق و مستەفا كازمی، سەرۆك وەزیران جەخت لە
گرنگی چارەسەركردنی كێشە داراییەكانی نێوان حكومەتی عێراق و حكومەتی هەرێم
دەكەنەوە.
ئاوێنە: بەپێی راگەیەندراوێكی سەرۆكایەتی كۆمار، ئەمڕۆ پێنجشەممە ٢٠٢٠/٨/٦ لە بەغدا
بەرهەم ساڵح، سەرۆك كۆماری عێراق پێشوازیكرد لە مستەفا كازمی، سەرۆك وەزیران.
لە دیدارەکەدا
گفتوگۆكرا دەربارەی كۆی بارودۆخی سیاسی و ئەمنی و تەندروستی و ئابوری وڵات و جەختكرایەوە
لەپێویستی ئەنجامدانی هەڵبژاردنی پێشوەختەی پاك و بێگەرد وەك پابەندبونێک بە کارنامەی
حكومەت.
ھەر لە دیدارەکەدا
سەرۆک کۆمار و سەرۆک وەزیران، جەختیان لە پێویستی راوەدونانی پاشماوەکانی تیرۆر و
بەردەوامیدان بە سەرکەوتنەکانی هێزە ئەمنییەکان و پارێزگاریکردن لە دەستکەوتەکان و
چەسپاندنی ئاسایش و ئارامی لە تەواوی شارەکانی عێراقدا، ھاوکات گفتوگۆیشکرا لەبارەی
چۆنیەتی بەرەنگاربونەوەی پەتای کۆرۆنا و پشتیوانیکردنی لەلایەنە تەندروستییەکان و
زامنکردنی سەلامەتی و تەندروستی هاوڵاتیان، هەروەها خستنەروی چارەسەر و ڕێوشوێنی پێویست
بۆ دەربازبون لە قەیرانی ئابوری و كەمكردنەوەی خەرجی حكومەت و زیادكردنی سەرچاوەی
داھاتی دەوڵەت و چەسپاندنی بنەمای چاكسازی لە وڵاتدا.
لە تەوەرێکی دیکەی
دیدارەکەدا جەختکرایەوە لەگرنگی بەھێزکردنی پەیوەندییەكانی نێوان حكومەتی فیدراڵ و
حكومەتی هەرێمی كوردستان و پێوێستی چارەسەركردنی كێشە داراییەكان، بەجۆرێک مافە دەستورییەكانی
سەرجەم هاوڵاتیان و موچەخۆرانی عێراق و ھەرێمی کوردستان بپارێزێت.
لە کۆتایی دیدارەکەدا
پەرەسندنە نێودەوڵەتی و هەرێمایەتییەكان و رۆڵی جەمسەری عێراق لە چەسپاندنی ئاشتی
و سەقامگیری لە ناوچەكەدا گفتوگۆی لە بارەوە كرا.