2020-08-07 873
وه‌فدی دانوستانكاریی هه‌رێم
به‌وته‌ی ئه‌ندامێكی لیژنه‌ی دارایی په‌رله‌مانی عێراق، ئەو هەوڵانەی ئێستا هەن لەنێوان حكومه‌تی هەرێم‌و بەغداد، زیاتر هەوڵی پینەوپەڕۆن نەک رێککەوتنێکی تۆکمەی درێژخایه‌ن.
ئاوێنه: هۆشیار عه‌بدوڵا، ئه‌ندامی لیژنه‌ی دارایی په‌رله‌مانی عێراق باس له‌پرسی رێككه‌وتنی نێوان حكومه‌تی هه‌رێم‌و حكومه‌تی عێراق ده‌كات‌و ده‌ڵێت، "ئەو هەوڵانەی ئێستا هەن لەنێوان هەرێم‌و بەغداد، زیاتر هەوڵی پینەوپەڕۆن نەک رێککەوتنێکی تۆکمە، ئەگەر سەریشبگرن تەمەنیان یەک دو مانگ زیاتر تێپەڕنەکا".
ئاماژه بۆ ئه‌وه‌ش ده‌كات كه وەزارەتی دارایی عێراق ئێستا سەرقاڵی ئامادەکردنی رەشنوسی بودجەی 2021 ە، رێكکەوتنی نێوان هەرێم‌و بەغداد پێویستە لەو یاسایەدا جێگەی بکرێتەوە.
هۆشیار عه‌بدوڵا ده‌نوسێت، تا ئێستا بەشێوەیەکی فەرمی باسی رێکكەوتنی نێوان هەرێم‌و بەغداد نەهاتۆتە لیژنەی دارایی ئەنجومەنیی نوێنەران، هەرکاتێکێش بێتە پەرلەمان دەبێ وەڵامیی پێویست‌و قەناعەت پێهێنەری سەبارەت بەدۆسیه‌ی نەوتی هەرێم تێدابێت بۆئەوەی لەپەرلەمان بتوانرێت کاری بۆ بکرێت‌و لەیاسای بودجەدا جێی بکرێتەوە.
به‌بۆچونی ئه‌و ئه‌ندامه‌ی لیژنه‌ی دارایی، فایلی نەوت بەهۆی جۆری گرێبەست‌و رێکكەوتنی نهێنی‌و بەسەوزی فرۆشتنی پێشوەختەوە، بۆتە کۆڵێکی گران بەشانیی هەرێمەوە! خەڵک‌و موچەخۆران باجەکەی ئەدەن، تا ئەم لەحزەیەش نیعمەتە بۆ بنەماڵە سیاسیەکان، کێشەو گەندەڵیی‌و ئالۆزییەکانی نەوتی هەرێم هۆکاری سەرەکی رێکنەکەوتنی نێوان هەولێرو بەغدایە.
هۆشیار عەبدوڵا