2020-08-08 444
رێکخراوی هەنگاو بۆ مافی مرۆڤ رایگەیاند" دۆسیەی حەیدەر قوربانی، بەندکراوی سیاسیی کورد بۆ بەشی جێبەجێکردنی سزاکانی دادگای سنە بەڕێکراوە، "ئەگەریش زۆرە لە رۆژانی داهاتودا ئەو سزایە جێبەجێ بکرێت".
ئاوێنه: رێکخراوی هەنگاو بۆ مافی مرۆڤ لە راپۆرتێکدا بڵاویکردەوە، دۆسیەی بەندکراوی سیاسیی کورد حەیدەر قوربانی بەڕێ کراوە بۆ بەشی جێبەجێکرانی حوکمەکانی دادسەرای سنە بە مەبەستی جێبەجێکرانی حوکمی سێدارەی ناوبراو و ئەگەری زۆرە لە رۆژانی داهاتوودا ئەو حوکمە جێبەجێ بکرێ.
هەروەها هەنگاو پێشتر رایگەیاندبوو" تەنیا بەڵگەی سەلماندن بۆ تۆمەتی کوشتن کە دراوەتە پاڵ حەیدەر قوربانی، دانپێدانانی ناوبراو لە ژێر ئەشکەنجەی نامرۆڤانە لە دەستبەسەرگەی ئیتلاعاتی سنەدایە".
هەنگاو داوا لە هەموو رێکخراو و چالاکانی مافی مرۆڤ دەکات کە بە مەبەستی گوشارخستنە سەر کۆماری ئیسلامیی ئێران و پێشگرتن لە بەڕێوەچوونی حوکمی سێدارەی ئەو بەندکراوە سیاسییە بە خێرایی زانیاریی لەم بارەوە بڵاو بکەنەوە و هەموو هەوڵی خۆیان بخەنە گڕ.
ڕۆژی پێنجشەممە (٦ی ئاگۆستی ٢٠٢٠)، حوکمی سێدارەی حەیدەر قوربانی، بەندکراوی سیاسی خەڵکی کامێران لەلایەن لقی ٢٧ی دیوانی بەرزی وڵاتی ئێرانەوە پەسەند کراوە و پارێزەرەکانی ئەو حوکمەیان بە بنەماڵەی ڕاگەیاندووە.
یەکێک لە نزیکانی بنەماڵەی قوربانی لەوبارەوە بە هەنگاوی ڕاگەیاند" حەیدەر قوربانی مانگی ڕێبەندانی ساڵی ڕابردوو لەلایەن لقی یەکەمی دادگای شۆڕشی سنە بە سەرۆکایەتی دادوەری “سەعیدی” بە تۆمەتی “هاوکاری و ئەندامەتی لە حیزبی دێموکراتی کوردستانی ئێران” حوکمی سێدارەی بەسەردا سەپاوە و ئەو حوکمە ڕێکەوتی (٢٨ی ژوئیەی ٢٠٢٠) لە ناو بەندیخانەی سنە بە فەرمی پێی ڕاگەیەندراوە".
حەیدەر قوربانی مانگی ڕەزبەری ساڵی (پاییزی ٢٠١٦) لە گەڵ ژن براکەی بە ناوی "مەحموود سادقی" کە هەردوویان خەڵکی گوندی "بزوەش" سەر بە شاری کامێران بوون، لەلایەن هێزەکانی ئیدارەی ئیتلاعات دەستبەسەر و لەوکاتەوە لە بەندیخانەی ناوەندیی شاری سنە دەستبەسەرن.
ئەو دوو هاووڵاتییە کوردە لە ڕیکەوتی (٦ی ئۆکتۆبری ٢٠١٩) لە دۆسیەیەکی دیکەدا و لەلایەن لقی ١ی دادگای تاوانەکانی پارێزگای سنە بە تۆمەتی "هاوکاری کردن و کارئاسانی بۆ کوشتنی چەند ئەندامی سپای پاسداران لە کامێران" دادگایی کرابوون. بە پێی ئەو حوکمە حەیدەر قوربانی حوکمی ١١٨ ساڵ و ٦ مانگ بەندکران و لێدانی ٢٠٠ قامچی و مەحموود سادقی حوکمی ٤٠ ساڵ و ٦ مانگ بەندکران و لێدانی ٢٠٠ قامچییان بە سەردا سەپابوو.
حکوومەتی ئێران سێ ساڵ پێش لە یەکێک لە کاناڵەکانی خۆی بە ناوی (پرێس تی وی) کە کاناڵێکی ئینگلیزی زمانە، فیلمێکی لە دانپێدانانی حەیدەر قوربانی، بەندکراوی سیاسی کورد بڵاو کردەوە.
بە وتەی نزیکانی ناوبراو، حەیدەر قوربانی لە ژێر ئەشکەنجەی نامرۆڤانە، ناچار بەو دانپێدانانە بووە و ناچار کراوە کوشتنی چەند ئەندامی سپای پاسداران وە ئەستۆی خۆی بگرێت.
لەو فیلمە ٢٠ خولەکیەدا، تۆمەتبار لە پێش بنەماڵەی ئەو کوژراوانە کە سەر بە حکوومەتی ئێرانن، دانێشتووە و دان بە کوشتنیان دەنێت.