خۆپیشاندەرانی توڕەی بەیروت "پەتی سێدارە" بۆ "بەرپرسانی گەندەڵ" هەڵدەخەن
  2020-08-08       439       

ئەمڕۆ شەممە، پێكداهەڵپژان لەنێوان خۆپیشاندەرانی توڕەی بەیروت و هێزە ئەمنییەكاندا لەنزیك پەرلەمانی لوبنان رویدا، ئەوەش لەدوای چوار رۆژ لە تەقینەوە گەورەكەی بەندەری بەیروت كە توڕەییەكی زۆری هاوڵاتیانی دژبە دەسەڵاتدارانی وڵاتەكە لێكەوتۆتەوە.

ئاوێنە: بەپێی كەناڵی "ئەلحوڕە"، گەنجانی توڕەی نێو خۆپیشاندانەكانی بەیروت ئەمڕۆ هێزە ئەمنییەكانیان داوەتە بەر بەردو هێزە ئەمنییەكانیش بە گازی فرمێسكڕێژ هەوڵی بڵاوەپێكردنی ئەو خۆپیشاندەرانەیان داوە كە ویستویانە بچنە نێو بینای پەرلەمان.

لەلای خۆیشییەوە سوپای لوبنان داوای لە خۆپیشاندەران كردوە شێوازی ئاشتیانەی خۆپیشاندانەكان بپارێزن، ئەوەش لەكاتێكدایە كە هێشتا هاتنی هاوڵاتیانی ناوچەكانی دیكەی لوبنان بۆ بەیروت بەردەوامە بەمەبەستی بەشداریكردن لە خۆپیشاندانەكاندا.

خۆپیشاندەران سیاسەتەكانی حكومەت و دەسەڵاتدارانی ئەو وڵاتە لەسایەی تەقینەوەكەی بەنداوی بەیروتدا، رەتدەكەنەوە كە بوەهۆی گیانلەدەستدانی زیاتر لە 150 كەس و برینداربونی هەزارانی دیكە ئەوەش وێڕای زیانێكی ماددی وێرانكەر كە لەپایتەخی وڵات كەوتۆتەوە.

بەگوێرەی نوێترین ئاماری وەزارەتی تەندروستی لوبنان، كە ئەمڕۆ شەممە، بڵاویكردۆتەوە، ژمارەی ئەوانەی لە تەقینەوەكەدا گیانیان لەدەستداوە بۆ 158 كەس بەرزبۆتەوەو ژمارەی بریندارەكانیش گەیشتۆتە زیاتر لە شەش هەزار كەس و تا ئێستاش 21 كەس بێسەروشوێنن.

لە چەند گرتەیەكی ڤیدیۆیی خۆپیشاندانەكان دەردەكەوێت كە بەشێك لە خۆپیشاندەران دروشمی دژبە حزبوڵای لوبنانی دەڵێنەوەو بە "تیرۆریست" ناوی دەبەن.

هەروەها لە بەشێك لەو وێنەو ڤیدیۆییانەی خۆپیشاندانەكاندا كە لەلایەن چالاكوانانەوە لە تۆڕە كۆمەڵایەتییەكان بڵاوكراونەتەوە، دەردەكەوێت كە خۆپیشاندەران لە شەقامەكاندا "پەتی سێدارە"یان هەڵخستوە كە بەقسەی خۆیان بۆ "بەرپرس و سیاسەتمەدارانی گەندەڵ"ی وڵاتە.

 

زۆرترین بینراو
© 2021 Awene Online, Inc. All Rights Reserved.
×