2020-08-10   2016     
مەلا بەختیار ئەندامی ئەنجومەنی باڵای سیاسی یەكێتی لە شەشەمین ساڵیادی ڕزگاركردنی شارۆچكەی مەخمور پەیامێكی ڤیدیۆیی بڵاوكردەوە و وردەكاری هەندێك لە ڕووداوەكانی ئەوكاتە ئاشكرا دەكات.
ئاوێنه: مەلا بەختیار ڕوونی دەكاتەوە كە پێش كەوتنی مەخمور دیدارێكی لەگەڵ مەسعود بارزانی سەرۆكی ئەوكاتی هەرێمی كوردستان ئەنجام داوە و تێیدا بارزانی نیگەران بووە لەو دۆخەی بە هۆی نزیكبوونەوەی داعش لە سنووری هەرێمی كوردستان دروست بووە.
مەلا بەختیار ئەوەش دەخاتەڕوو كە دوای داگیركردنی مەخمور لەلایەن داعشەوە، مەترسی لەسەر هەولێریش دروست بوو، بۆیە یەكێتیی نیشتمانیی كوردستان هێزی پێشمەرگە و دژە تیرۆری بۆ هەولێر نارد.
دەشڵێت كاتێك كە دژە تیرۆری یەكێتی گەیشتووەتە هەولێر، به سهدان خێزانی ههولێر لهترسی داعش خهریك بوون ههڵدههاتن، بینی هێزهكهی دژهتیرۆر ورەی ئەو هاووڵاتییانەی بەرزكردووەتەوە نیوەیان گەڕاونەتەوە.
مەلا بەختیار وردەكاری كۆبوونەوەیەكی نێوان مەكتەبی سیاسی پارتی و یەكیێتی خستەڕوو كە بە ئامادەبوونی لاهور شێخ جەنگی و بافڵ تاڵەبانی هاوسەرۆكانی ئێستای یەكێتی بەڕێوەچوو كە ئەو كات دوو فەرماندەی دژە تیرۆر بوون.
مەلا بەختیار دەڵێت: “لە كۆبوونەوەكەدا كاك مەسعود زۆر نیگەران بوو لە پاشەكشەی پێشمەرگە لە سەرانسەری بەرەكان، دەیگوت من چاوەڕێم نەدەكرد كە پێشمەرگە وابێت و چی ماوە بۆ پێشمەرگەی نەكەم، من وتم جەنابی كاك مەسعود ئێستا وەختی ئەوە گلەییانە نییە، ئێستا بە جەنابت دەڵێین ئێمە هاتووین و دڵنیابن ناهێڵین هەولێر بگیرێت، كاك مەسعود وتی، چۆن ناهێڵن، وتم ئەوە هێزی دژە تیرۆرمان هەیە و ئێمە ئەتوانین داعش بشكێنین و دەبێت بچین بۆ مەخمور و ئەو هەڕەشەیەش نەهێڵین”.
مەلا بەختیار ڕاشیگەیاند كاتێك بڕیار درا هێرش بكرێتە بۆ مەخمور، پێش ئەوەی ئێمە بگەینە ئەوێ دژە تیرۆر دەستیكردبوو بە شەڕێكی سەخت و پاشان سایلۆی مەخموریشیان كۆنترۆڵ كرد كە گرنگترین خاڵی مەخمور بوو، دواتریش سەركەوتنمان ڕاگەیاند.
هاوكات ستایشی هەموو ئەو هێزانەشی كرد كە بەشدارییان لە هێرشی كۆنترۆڵكردنی مەخموردا كردبوو.