فەرماندەی فەیلەقی قودسی سوپای پاسداران لە بەغدا چاوی بە مستەفا كازمی دەكەوێت
  2020-08-17       685       

بەپێی قسەی سیاسەتمەدارێكی دیاری شیعە، مستەفا كازمی، سەرۆك وەزیرانی عێراق، بەرلە یەكەم گەشتە چاوەڕوانكراوەكەی بۆ ئەمریكا، لە بەغدا پێشوازی كردوە لە ئیسماعیل قائانی، فەرماندەی فەیلەقی قودسی سوپای پاسداران و گوێی لە "پەیامە نەرمەكان"ی گرتوە.

ئاوێنە: دوای ئەوەی قاسم سولەیمانی لە سەرەتای مانگی كانونی دوەمی ئەمساڵدا لە هێرشێكی ئەمریكادا لە بەغدا كوژرا، ئیسماعیل قائانی وەك شوێنگرەوەی كرایە فەرماندەی فەیلەقی قودسی سەربە سوپای پاسداران.

عیزەت شابەندەر، سیاسەتمەداری دیاری شیعە، لە تویتێكدا نوسیویەتی: لەكاتێكدا هێشتا كردنە ئامانجی هێزەكانی ئەمریكا لە بنكەی سەربازی تاجی و كردنە ئامانجی ناوچەی سەوز بە موشەك رانەوەستاون، مستەفا كازمی، سەرۆك وەزیرانی عێراق لە بەغدا پێشوازی كردوە لە ئیسماعیل قائانی و گوێی لە "پەیامە نەرمەكان"ی گرتوە، ئەوەش بەر لە یەكەم گەشتی مستەفا كازمی بۆ ویلایەتە یەكگرتوەكانی ئەمریكا و دیداری لەگەڵ ترەمپ لە 20ی ئەم مانگەدا.

بڕیارە رۆژی پێنجشەممە مستەفا كازمی سەرۆك وەزیرانی عێراق بەسەردانێكی رەسمی بگاتە ئەمریكاو دیداری لەگەڵ دۆناڵد ترەمپ، سەرۆكی ئەمریكادا هەبێت.

زۆرترین بینراو
© 2021 Awene Online, Inc. All Rights Reserved.
×