ئەڵمانیا: پیاوێكی عێراقی بەئەنقەست و بەپاڵنەری ئیسلامیانەوە روداوێكی هاتوچۆی دروستكردوە
  2020-08-19       434       

وتەبێژی داواكاری گشتی بەرلین رایگەیاند: پیاوێكی عێراقی لەسەر رێگایەكی خێرای شارەكە بەئەنقەست روداوێكی هاتوچۆی دروست كردوەو شەش برینداری لێكەوتۆتەوە، روداوەكەشی بە "هێرشێك كە پاڵنەری ئیسلامگەرایانەی لە پشتە" ناوبردوەو دەشڵێت: بەڵگە هەن كە پیاوەكە كێشەی دەرونی هەیە.

ئاوێنە: بەپێی هەواڵێكی كەناڵی دوێچەڤیلە-ی ئەڵمانی، وتەبێژی داواكاری گشتی بەرلین ئەمڕۆ چوارشەممە رایگەیاند: دەسەڵاتداران دەستیان كردوە بە لێكۆڵینەوە لە زنجیرەیەك روداوی هاتوچۆ لەسەر رێگەیەكی خێرای بەرلین كە شەوی رابردو رویداوەو بە "هێرشێك"ی دەزانن كە "پاڵنەری ئیسلامگەرایانەی لە پشتە".

ئاماژەی بەوەشداوە كە تۆمەتباری روداوەكە تەمەنی 30 ساڵانەو رەگەزنامەی عێراقییەو كێشەی دەرونی هەیە.

وتەبێژی داواكاری گشتی بەرلین ئاماژەی بەوەداوە كە لێكۆڵینەوەكان دژبەو تۆمەتبارە عێراقییە  بە تۆمەتی دەستبردن بۆ كوشتن دەستیان پێكردوەو هێمای بۆ ئەوەش كرد كە پێكدادانی ئۆتۆمبێلەكان بەئەنقەست بوەو وتی"پێمان وانییە روداوەكە بە رێككەوت روی دابێت"

بەگوێرەی هەندێك لە میدیاكان ئەو پیاوە عێراقییە لەكاتی دروستكردنی روداوەكەدا كە تێیدا چەند ئۆتۆمبێل و ماتۆڕسكیلێك پێكیانداداوە، لە ئۆتۆمبێلەكەی دابەزیوەو هاواری كردوە "ئەڵاهو ئەكبەر."

روداوەكە بۆتە داخستنی رێگاكە بۆ ماوەی چەند سەعاتێك.

هەروەها رۆژنامەی "بیلد"ی ئەڵمانی لەزاری شایەتحاڵێكەوە وتویەتی: پیاوە عێراقییەكە هاواری كردوە كەس لێی نزیك نەبێتەوە ئەگەر نا هەمویان دەمرن و هەڕەشەی تەقاندنەوەی بۆمبێكی كردوە بەرلەوەی لەلایەن هێزە ئەمنییەكانەوە دەستگیربكرێت.

وتەبێژی پۆلیس هێمای بۆ ئەوە كردوە كاتێك پیاوەكە دەستگیركراوە، وتویەتی: "تەنێكی مەترسیدار" لە سندوقێكدایە لە ئۆتۆمبێلەكەیدا، بەڵام دوای پكشنین و كردنەوەی سندوقەكە هیچ شتێكی ترسناكی تێدا نەبوە.

هەروەها دەسەڵاتی دادوەری ئاماژەی بەوەداوە كە پۆلیس لەوەی كۆڵینەوە داخۆ تۆمەتبارەكە كێشەی دەرونی هەبێت و بەدوری نازانن پاڵنەری ئیسلامگەرایانە لە پشت كارەكەیەوە بێت.

هەرچەندە داواكاری گشتی و پۆلیس ئاماژەیان بەوەداوە كە تا ئێستا بەڵگە نییە لەسەر ئەوەی تۆمەتبارەكە پەیوەندی بە رێكخراوێكی تیرۆریستییەوە هەبێت بەڵام بەشێك لە میدیاكانی ئەڵمانیا بڵاویان كردۆتەوە كە ئەو كەسە پەیوەندی لەگەڵ كەسایەتییەكەی ئیسلامی مەترسیداردا هەبوەو ئەو كەسە مەترسیدارەش لەسەر رێكخراوی داعش ئەژماردەكرێت.


زۆرترین بینراو
© 2021 Awene Online, Inc. All Rights Reserved.
×