مایك پۆمپیۆ، وەزیری دەرەوەی ئەمریكا، پشتیوانی وڵاتەكەی بۆ ئەنجامدانی
هەڵبژاردنی پێشوەخت لەعێراق دەربڕی و گروپە چەكدارەكانیشی بە مەترسی بۆ سەر عێراق
ناوبردن و راشیگەیاند: داوام لە بەغدا كردوە لەسەر بودجە لەگەڵ حكومەتی هەرێمی
كوردستان رێكبكەون.
ئاوێنە: مایك پۆمپیۆ، وەزیری دەرەوەی ئەمریکا، ئەمڕۆ چوارشەممە، لە
كۆنگرەیەكی رۆژنامەوانی هاوبەشدا لەگەڵ فواد حسێن، وەزیری دەرەوەی عێراق، وتی:
وڵاتەكەی یارمەتی بوژانەوەی ئشەو كەمینانە دەدات كە روبەڕوی زۆرترین زیان بونەتەوە
لەسەر دەستی داعش لەوانە مەسیحییەكان، ئێزیدی و شەبەك و نزیكەی نیو ملیار دۆلارمان
بۆیان تەرخان كردوەو هەروەها 204 ملیۆن دۆلاری دیكە وەك هاوكاری مرۆیی پێشكەشی
خەڵكی عێراق دەكەین.
لەبەشێكی دیكەی قسەكانیدا وەزیری دەرەوەی ئەمریكا ئاماژەی بە مەترسی گروپە
چەكدارەكان لە عێراق كردو رایگەیاند: هێشتا كار زۆر ماوە بكرێت و ئەو گروپانە لەژێر
كۆنترۆڵی تەواوی سەرۆك وەزیراندا نین و وتیشی: هەرچی زوە پێویستە پۆلیسی لۆكاڵی
جێی ئەو گروپانە بگرێتەوە.
هەروەها لەبارەی ئابوری و وەبەرهێنان لەعێراق رایگەیاند: چاویان لە رۆژێكە
كە عێراق پێویستی بە هاوكاری نەبێت و وتیشی"عێراقێكی خاڵی لە گەندەڵی و
خۆشگوزەرانمان دەوێت."
لەبەرشێكی دیكەی قسەكانیدا پۆمپیۆ وتی"هانی بەغدام داوە لەسەر بودجە لەگەڵ
حکومەتی هەرێمی کوردستان رێكبكەون."