ئێران: ئاگركەوتنەوەكەی دامەزراوەی ئەتۆمی "نەتەنز" هێرشێكی تێكدەرانە بوە
  2020-08-23       542       

بەهرۆز كەمالوەندی، وتەبێژی رێكخراوی وزەی ئەتۆمی ئێران، ئەمڕۆ یەكشەممە، رایگەیاند: ئەو ئاگرەی مانگی رابردو لە دامەزراوەی ئەتۆمی نەتەنز لە پارێزگای ئەسفەهان كەوتەوە، لە ئەنجامی هێرشێكی تێكدەرانە بوە.

ئاوێنە: بەهرۆز كەمالوەندی، بە كەناڵی "ئەلعالم"ی رایگەیاند"دەسەڵاتدارانی ئەمنی هۆكارو وردەكاری تەقینەوەكە لە لەكاتێكی گونجاودا ئاشكرادەكەن."

پێشتر چەند بەرپرسێكی ئێرانی رایانگەیاندبو كە ئەو ئاگرەی لەو دامەزراوەیە كەوتۆتەوە رەنگە ببێتە هۆی خاوكردنەوەی پڕۆسەی پیتاندنی یۆرانیۆم لەو دامەزراوە ئەتۆمییەی وڵاتدا.

دامەزراوەی نەتەنز بۆ پیتاندنی یۆرانیۆم، كە بەشێكی زۆری لەژێر زەویدایە، یەكێكە لەو دامەزراوە ئەتۆمیانەی ئێران كە ئاژانسی نێودەوڵەتی وزەی سەربە نەتەوە یەكگرتوەكان رێگەپێدراوە بۆ پشكنینی.

پێشتر هەندێك لە بەرپرسانی ئێرانی باسیان لەوە كردبو كە رەنگە هۆكاری ئاگرەكەی نەتەنز بەهۆی هێرشی ئەلیكترۆنییەوە بوبێت و راشیانگەیاندبو كە هەر وڵاتێك ئەو هێرشەی ئەنجام دابێت، تاران وەڵامی بۆی دەبێت.

ئاژانسی رەسمی كۆماری ئیسلامی ئێران لە مانگی تەمموزدا ئاماژەی بەوەدابو كە ئاگركەوتنەوەكەی نەتەنز پێدەچێت هێرشی وڵاتانی وەك ئیسرائیل یاخود ئەمریكا بێت.

زۆرترین بینراو
© 2021 Awene Online, Inc. All Rights Reserved.
×