2020-08-30   548     
پەرلەمانتارێکی دیکەی ئەنجوومەنی نوێنەرانی عێراق بەهۆی سەختیی تووشبوونی بە ڤایرۆسی کۆڕۆنا رەوانەی چاودێری چڕ کرا، تا ئێستا ٥٠ پەرلەمانتار توشی کۆرۆنا بون.
ئاوێنە: لە بڵاوکراوەیەکی تۆڕی کۆمەڵایەتی فەیسبووک، عەبدولرەحمان ئەللویزی، پەرلەمانتاری خولی پێشوو ئاماژەی بەوە کردووە کە ئەمڕۆ پەرلەمانتار حەسەن خەلەف جبوری رەوانەی چاودێری چڕ کراوە بەهۆی سەختیی تووشبوونی بە ڤایرۆسی کۆڕۆنا.
بەپێی زانیارییەکانی ئەنجوومەنی نوێنەران، تا ئێستا زیاتر لە ٥٠ پەرلەمانتار تووشی ڤایرۆسی کۆڕۆنا بووە و هەندێکیان باریان ناجێگیرە. لەوانە غەیدا کەمبەش بەهۆی کۆڕۆناوە گیانی لەدەستدابوو.
شایەنی باسە زۆربوونی تووشبووان لە ناو ئەنجوومەن بووەتە هۆکاری ئەنجام نەدرانی پەرلەمان. هەر لەو سۆنگەیەوە رۆژی ٢٤ی ئاب، حەسەن کەعبی، جێگری یەکەمی سەرۆکی ئەنجوومەنی نوێنەرانی عێراق تووشبوونی خۆی بە ڤایرۆسی کۆڕۆنا راگەیاندبوو.
کۆی گشتی ئەنجوومەنی نوێنەران لە ٣٢٩ پەرلەمانتار پێکهاتووە، بەپێی سەرۆکایەتی پەرلەمان، بڕیار وایە ئەنجوومەن دانیشتنەکانی خۆی لە مانگی ئەیلوولەوە دەستپێبکاتەوە.