2020-09-02 525
دەستەی دەروازە سنوریەکانی عێراق رایگەیاند، کۆی گشتی داهاتی مانگی رابردوی دەروازە سنوریەکان زیاتر لە 107 ملیار دیناری عێراقی بوە.
ئاوێنه: لەبەیاننامەیەک دەستەی دەروازە سنوریەکانی عێراق بڵاویکردەوە، کۆی گشتی داهاتی مانگی (ئاب/8)ی ئەمساڵ زیاتر 107 ملیار و 269 ملیۆن و 418 هەزار و 500 دینار بوە، ئەوەش بەهۆی رێکارەکانی خۆپارێزی لە ڤایرۆسی کۆرۆناوە لەکۆی 21 دەروازە تەنها 10 دەروازە داهاتیان هەبوە.
ئاماژەی بەوەشکردوە، داهاتی دەروازە سنوریەکان لەمانگی (تەموز/7)ی ئەمساڵدا 10 ملیار دیناربوە و لەمساڵدا بەرێژەیەکی باش روی لەزیادبون کردوە.
دوێنێش لەبەیاننامەیەکدا دەستەی گشتی گومرگەکانی عێراق بڵاویکردەوە، سەرەڕای ناتەواوی بارودۆخی کارکردن و ئەو بەربەستانەی بەهۆی بڵاوبونەوەی ڤایرۆسی کۆرۆناوە دروستبون، مانگی رابردو کۆی گشتی داهاتی خاڵە سنوریەکان 86 ملیار دینار بوە.