حەسەن رۆحانی، سەرۆك كۆماری ئێران رایگەیاند: وڵاتەكەی روبەڕوی سزای ئابوری
توند بۆتەوەو لەكاتێكدا داهاتی نەوتی وڵاتەكەی لەساڵی 2011دا 120 ملیار دۆلار بوە،
بەڵام ساڵی رابردو بۆ 20 ملیار دۆلار دابەزیوە.
ئاوێنە: حەسەن
رۆحانی، ئەمڕۆ یەكشەممە، لەمیانی بەشداریكردنی لە رێوڕەسمی دەسپێكی ساڵی نوێی
خوێندن لە زانكۆكانی ئێران، لە وتەیەكدا رایگەیاند: رەنگە لە مێژوی جیهاندا كەمتر سزایەكی
ئابوری توندی لەو شێوەیە ببینینەوە كە نزیكەی سێ ساڵە بەسەر ئێمەدا سەپێنراوە
بەڵام ئێمە رێگەمان نەداوە دوژمنانمان بە ئامانجە سەرەكییەكەیان بگەن و تەسلیم
نەبوین.
ئەوەشی خستۆتەڕو: داهاتی نەوتی ئێمە لە
ساڵی 2011، 120 ملیار دۆلار بوە، بەڵام ساڵی رابردو تەنیا 20 ملیار دۆلار بوە.
ئەوەش دەریدەخات كۆمەڵگەی ئێمە روبەڕوی چ كێشەیەكی گەورە بوەتەوە.
سەرۆك كۆماری ئێران جەختی كردەوە كە
وڵاتەكەی دەبێت پشت بە توانا ناوخۆییەكانی ببەستێت و نابێ چاوی لەدەرەوە بێت لەگەڵ
ئەوەشی وتی: ئەو راستییەش هەیە كە بەبێ مامەڵەكردن لەگەڵ جیهان، ژیان زۆر سەختە.