وەزارەتی خەزێنەی ئەمەریکا سزای بەسەر کۆمپانیایەک و گروپـێک و 45 کەسدا سەپاند کە کاری هاککردن و سیخوڕی سەر ئنتەرنێت بۆ حکومەتی ئێران دەکەن.

ئاوێنە: وەزارەتەکە ئەمڕۆ پـێنجشەممە لە بەیاننامەیەکدا نوسیویەتی: سزایان بەسەر گروپی ئێرانی ناسراو بە Advanced Persistent Threat 39 یان (APT39) و 45 کەس کە کاری بۆ دەکەن لەگەڵ کۆمپانیای (رایانش هوشمند رانا)ی ئێرانیدا سەپاندوە.

بەپـێی بەیاننامەکە ئەمانە کار بۆ وەزارەتی ئیتلاعاتی ئێران دەکەن و سیخوڕی بەسەر ئێرانی و خەڵکی بیانیش دەکەن و سەدان کەس و کۆمپانیا و دەزگایان لە زیاتر لە 30 وڵات کردوەتەوە ئامانج، لەوانە نزیکەی 15 کۆمپانیای ئەمەریکی.

وەزارەتەکە ئەوەشی خستۆتەڕو كە کۆمپانیای رانا بۆ ئەم مەبەستە بەرنامەی سیخوڕی کۆمپیوتەری بەکارهێناوە و لەگەڵ گروپی APT39 سیخوڕیانکردوە بەسەر کەسانی ئۆپۆزسیۆن و ڕۆژنامەوانانی ئێرانی و فەرمانبەرانی حکومەت و خوێندکاران و ڕێکخراوە ناحکومیـیەکان و پەنابەران و تەنانەت زانایانی ژینگە.

وەزارەتی خەزێنە ئەوەشی وتوە: ژمارەیەک لەو کەسانەی لە ناو ئێراندا سیخوڕییان بەسەردا کراوە، لە لایەن ئیتلاعاتەوە دەستگیرکراون و ڕوبەڕوی ئەشكەنجەی جەستەیی و دەرونی بونەتەوە.