سەرۆكی پەرلەمانی عێراق كە بەسەردانێك لە كوەیتە داوای لەو وڵاتە كردوە كە بەغدا گەڕاندنەوەی قەرزەكانی قەرەبوكردنەوەی داگیركردنی كوەیت دوابخات ئەوەش بەهۆی قەیرانی داراییەوە.

ئاوێنە: بەپێی راگەیەندراوێكی نوسینگەكەی، محەمەد حەلبوسی سەرۆكی پەرلەمانی عێراق، دوێنێ پێنجشەممە، چاوی كەوتوە بە شێخ سوباح خالید حەمەد ئال سوباح سەرۆكی ئەنجومەنی وەزیرانی كوەیت.

 لەدیدارەكەدا گفتوگۆ سەبارەت بە پەیوەندی دۆستانەی هەردو وڵات و پتەوكردنی هاریكاری لەسەرجەم بوارەكاندا كراوە بەپێی بەرژەوەندی هاوبەش، گفتوگۆش سەبارەت بە دوای پێشهاتی ئیقلیمی و نێودەوڵەتی كراوە لەگەڵ گرنگی هەماهەنگی هاوبەش بۆ بەرەنگاربونەوەی ئاڵنگارییەكان كە ناوچەكە لەو باردوخە ئاڵۆزەدا پێیدا تێپەڕ دەبێت.

لەبەشێكی تری دیدارەكەدا تاوتوێی دۆزینەوەی میكانیزمێكی كاریگەر بۆ چاودرێریكردنی بڕیارەكانی كۆنگرەی كۆمەكبەخشان لە كوەیت و دەستەبەركردنی دەرفەتی وەبەرهێنان كراوە.

هەر لە دیدارەكەدا محەمەد حەلبوسی لەگەڵ سەرۆكی ئەنجومەنی وەزیرانی كوەیت تاوتوێی دۆسیەی وەجبەی ئەو قەرزانە كراوە كە لەسەر حكومەتی عێراق ماون بۆ كوەیت و دواخستنی گەڕاندنەوەیان بەهۆی قەیرانی دارایی و باری ئابوری كە وڵاتانی جیهان پێدا تێپەڕ دەبن لە نێویشیاندا عێراق، لەوبارەیەوە سەرۆك وەزیرانی كوەیت بەڵێنیداوە لەهەوڵەكانی بەردەوام دەبێت و لە چوارچێوەی ئەولەویەتیدا دەبێت ئاماژەشی بە ڕاسپاردەكانی ئەمیری وڵات كرد بۆ پشتیوانی لە عێراق لەسەرجەم بوارەكان.