دوای چەند رۆژێك
لە داواكەی وەزیری دەرەوەی ئەمریكا بۆ دۆزینەوەی چارەسەرێك بۆ ناكۆكییەكانی
نێوان قەتەر لەلایەك و سعودیەو ئیمارات و بەحرەین و میسر لەلایەكی تر، بەرپرسێكی
ئەمریكا رایگەیاند، وڵاتەكەی خوازیارە قەتەر وەك هاوپەیمانێكی سەرەكی خۆی
بناسێنێت.
ئاوێنە: تیمۆسی
لیندەركینگ، جێگری یاریدەدەری وەزیری دەرەوەی ئەمریكا بۆ كاروباری كەنداو، لە
كۆنگرەیەكی رۆژنامەوانیدا لەڕێگەی ئۆنلاینەوە بە رۆژنامەنوسانی راگەیاند، ئێمە سەرقاڵی
هەڵگرتنی هەنگاوێكین بۆ راگەیاندنی ناساندنی قەتەر وەك هاوپەیمانێكی سەرەكی لە
دەرەوەی ناتۆ.
بەپێی قسەی
بەرپرسە ئەمریكییەكە، ناساندنی وڵاتێك وەك هاوپەیمانی سەرەكی ئەمریكا لە دەرەوەی
ناتۆ، وا دەكات ئەو وڵاتە بتوانێت ئاسانتر چەك و كەرەستەو تەكنەلۆژیای سەربازی
ئەمریكا بەدەستبهێنێت و هەروەها ئەولەویەتیشی دەدرێتێ لە هاریكاری و مەشقی
سەربازیدا.
لەئێستادا 17
وڵاتە لەلایەن ئەمریكاوە لەدەرەوەی ناتۆ وەك هاوپەیمانی سەرەكی ناسێنراون كە
لەنێویاندا كوەیت و بەحرەین هەن.
خواستەكەی ئەمریكا
بۆ ناساندنی قەتەر وەك هاوپەیمانی سەرەكی خۆی لەكاتێكدایە كە دیداری چڕ لەنێوان
بەرپرسانی ئەمریكاو قەتەردا هەیە لەنێویشیاندا دیداری نێوان وەزیرانی دەرەوەی
هەردو ولات لە واشنتۆن كە لەم هەفتەیەدا بەڕێوەچو.
مایك پۆمپیۆ داوای
كردبو چارەسەرێك بۆ ناكۆكییەكانی نێوان قەتەر لەلایەك و سعودیەو ئیمارات و بەحرەین
و میسر لەلایەكی تر بدۆزرێتەوەو جەختیشی لە گرنگی سەرنج حستنەسەر روبەڕوبونەوەی
چالاكییەكانی ئێران كردبوەوە.
ئەو بەرپرسە
ئەمریكییە سەبارەت بە ئەگەری ئاساییكردنەوەی پەیوەندییەكانی قەتەر لەگەڵ ئیسرائیل
لەپاڵ ئیمارات و بەحرەیندا، وتی: قەتەر تۆمارێكی باشی لە كاركردن لەگەڵ ئیسرائیل
هەیە، پێمانوایە لەكۆتاییدا قەتەرییەكان دەگەنە رێككەوتنێكی بەرفراوان لەگەڵ
ئیسرائیل و هیواشی خواستوە ئەو كارە بەمزوانە روبدات.
تیمۆسی لیندەركینگ
جەختی كردۆتەوە كە وڵاتەكەی لەكۆتاییدا دەیەوێت سەرجەم وڵاتانی كەنداو
پەیوەندییەكانیان لەگەڵ ئیسرائیل ئاسایی بكەنەوە.
سەرچاوە: دوێچەڤیلە