ئۆپەراسیۆنەكانی سەڵاحەدین رەتیدەكاتەوە تەقینەوەكەی كۆگایەكی حەشدی شەعبی
لە بنكەی سپایكەر بەهۆی بۆردومانكردنەوە بوبێت.
ئاوێنە: عەبدولموحسین حاتەم، فەرماندەی ئۆپەراسیۆنەكانی پارێزگای سەڵاحەدین،
ئەمڕۆ هەینی، بە ئاژانسی رەسمی هەواڵی عێراقی راگەیاند: هیچ بارەگایەكی حەشدی
شەعبی لە بنكەی سەربازیی سپایكەر بۆردومان نەكراوە، لایەنە پەیوەندیدارەكان
سەردانی شوێنی روداوەكەیان كردوەو دەركەوتوە تەقینەوەكە لەنێو بینایەكی جێهێڵراودا
بوە.
ئەوەشی خستۆتەڕو: چەند بۆمبێك لەنێو ئەو بینایەی بنكەی سەربازیی سپایكەر
تەقیونەتەوە ئەوەش بەهۆی خراپی هەڵگرتنیان و بەرزبونەوەی پلەكانی گەرما.
ئاشكراشیكردوە كە تەقینەوەكە لە بارەگایەكی لیوای پێنجی حەشدی شەعبی بوەو
هیچ زیانێكی گیانی لێنەكەوتۆتەوە.
لای خۆیشییەوە شانەی راگەیاندنی ئەمنی عێراق رایگەیاندوە: تەقینەوەكە لەنێو
كۆگایەكی چەك و تەقەمەنیدا بوە كە بۆمبی چێنراوی تێدابوەو لە بنكەی سەربازیی سپایكەرو
دەركەوتوە كە هۆكاری تەقینەوەكە خراپ هەڵگرتنی چەك و تەقەمەنییەكان بوە.