په‌رله‌مانتارێك مەلەفێکی "مەترسیدار" سەبارەت بەدابەشکردنی زەوی لەسلێمانی ئاشكرا ده‌كات
  2020-09-22       1009       
ئەندامێكی لیژنەی دارایی ئەنجومەنی نوێنەرانی‌ عێراق مەلەفێکی "مەترسیدار" سەبارەت بەدابەشکردنی زەوی لەسلێمانی ئاشكرا ده‌كات‌و ده‌ڵێت، ئەو دۆسێیە وەک داکۆکی لەکەسوکاری شەهیدانی شەری داعش دەجوڵێنێت.

ئاوێنه‌: هۆشیار عەبدوڵا، ئەندامی لیژنەی دارایی ئەنجومەنی نوێنەران له‌ڕونكردنه‌وه‌یه‌كدا نوسیویه‌تی‌، "مەلەفێکی مەترسیدار هەیە سەبارەت بە دابەشکردنی زەوی لە سلێمانی بە ناوی ئەوەی بدرێتە کەس و کاری قوربانیانی شەڕی داعش، ئایا ئەنجومەنی پارێزگا و لیژنە تایبەتەکانی پەرلەمان ئاگاداری ئەو مەلەفەن؟ ئایا فعلا زەویەکان دراون بە وارسی شەهیدانی شەڕی داعش کە شایستەی هەمو خزمەتێکن یا خەڵکی تر؟".

ناوبراو ده‌ڵێت، "ئەم مەلەفە ئەرکی نوێنەرەکانی پارێزگای سلێمانییە لەئەنجومەنی پارێزگاو پەرلەمانی کوردستان بەدوایدا بچن، بەندە وەک نوینەرێکی شاری سلێمانی لە ئەنجومەنی نوێنەران ئەو باسە دەخەمە ڕوو، زانیاریەکان لەوە زۆرترن کە لێرە باسمکردون ، هەر کات لیژنەی لێکۆڵینەوەی لەسەر دروستبو  کۆی زانیاریەکانمان دەخەینە بەردەستی لیژنەکە."

ئه‌وه‌شی‌ نوسیوه‌، "ئەو دۆسێیە وەک داکۆکی لە کەسوکاری شەهیدانی شەری داعش دەجوڵێنم.با وەزارەتی شەهیدان جواب بداتەوە ئایا کەس و کاری ئەو شەهیدانە و کەمئەندامانی شەری داعش هەمویان زەویان وەرگرتوە؟ئایا پارێزگاری سلێمانی لەسەر داوای یەکەی ۷٠، دەسەلاتی هەیە شارەوانی سلێمانی دەستکراوە بکا زەوی دابەشبکا؟".

هۆشیار عەبدوڵا ده‌پرسێت، ئەنجومەنی پارێزگای سلێمانی ئاگاداری بریاری ژمارە ۱٠۹۹ ی پارێزگاری سلێمانیە کە لەرۆژی ۲۱ ی ۳ ی ۲٠۱۹ واژۆکراوە؟ ئایا بە گوێرەی ئەو بریارە چەند پارچە زەوی دابەشکراوە؟ زەویەکان کامانەن؟دراون بەکێ؟روبەریان چەندە؟هەمو ئەوانە پرسیار گەلێکن کەدەبێ بە زویی ئەنجومەنی پارێزگا بەدوایاندا بچێ.

ئه‌وه‌شی‌ خستۆته‌ڕو كه‌ مەلەفە مەترسیدارەکە ئەوەیە بەناوی کەسوکاری شەھید و قوربانیانی شەڕی داعش، هەزاران پارچە زەوی دابەشکراوە. ئایا ئەوە ئاسایی و یاساییە؟ ئەرکی ئەنجومەنی پارێزگا و پەرلەمانی کوردستانە بەدوایدا بچێت و راستیەکان بخاتە ڕوو ئەگەر باشیانکردوە دەستخۆشیان لێ بکەن و ئەگەریش نا لێیان بپێچنەوە.

زۆرترین بینراو
© 2020 Awene Online, Inc. All Rights Reserved.
×