"به‌هۆی‌ سكاڵایەكی‌ به‌رهه‌م ساڵح رۆژنامه‌نوسێك هه‌شت ڕۆژ له‌لایه‌ن پۆلیسه‌وه‌ ڕاده‌گیرێت‌"
  2020-09-22       677       
به‌رهه‌م ساڵح
سەنتەری میترۆ بۆ داكۆكیكردن له‌مافی‌ رۆژنامه‌نوسان ڕایده‌گه‌یه‌نێت كه‌ به‌هۆی‌ سكاڵایەكی‌ به‌رهه‌م ساڵح، سه‌رۆك كۆماری‌ عێراقه‌وه‌ رۆژنامه‌نوسێك له‌سلێمانی‌ هه‌شت ڕۆژ له‌لایه‌ن پۆلیسه‌وه‌ ڕاگیراوه.

ئاوێنه‌: میترۆ رایگه‌یاندووه‌، بەهۆی سكاڵایەك نوسەری وتاری "تا كەی سەرۆك كۆمار ڕۆنگ ساید لێ ئەخوڕێت!؟"، بەهرۆز جەعفەر، سەرۆكی ئینستیتیوتی مێدیتریانە بۆ توێژینەوەی هەرێمایەتی، ئەندامی لقی كەركوكی سەندیكای رۆژنامەنوسان، لەلای بنكەی پۆلیسی ئەزمڕ لەشاری سلێمانی راگیراوە.

ئاماژه‌ی‌ بۆ ئه‌وه‌شكردووه‌، "پارێزەرێكی بەرهەم ئەحمەد صالح سەرۆك كۆمار داواكەی جوڵاندووە، بۆ ماوەی 8 رۆژ توقیف، راگیراوە".

سەنتەری میترۆ داوا دەكات سەرۆك كۆمار سنگی فراوان بێت لەبەردەم نوسین و تەنانەت بڵاوكردنەوەی هەندێ زانیاری پشتنەبەستو بەسەرچاوەكانی سەرۆكایەتی كۆمار، چونكە دەرگای زانیاری هەموو كات ئاوەڵا نین بۆ نوسەران و رۆژنامەنوسان.


ده‌قی‌ راگه‌یه‌ندراوه‌كه‌ی‌ میترۆ:


لێدوانی رۆژنامەوانی ... بۆ بڵاوكردنەوە
نوسینێك لەسەر سەرۆك كۆمار نوسەرێكی خستە زیندان
بە هۆی سكاڵایەك نوسەری وتاری "تا كەی سەرۆك كۆمار ڕۆنگ ساید لێ ئەخوڕێت!؟"، بەهرۆز جەعفەر، سەرۆكی ئینستیتیوتی مێدیتریانە بۆ توێژینەوەی هەرێمایەتی، ئەندامی لقی كەركوكی سەندیكای رۆژنامەنوسان، لەلای بنكەی پۆلیسی ئەزمڕ لە شاری سلێمانی راگیراوە.
لەكاتی سەردانی هاوڕێكانی بەهرۆز پێیی راگەیاندوون " پارێزەرێكی بەرهەم ئەحمەد صالح سەرۆك كۆمار داواكەی جوڵاندووە، بۆ ماوەی 8 رۆژ توقیف، راگیراوە"
دۆسییەی رۆژنامەنوسان بە پێیی  یاسای ژمارە (35) ی ساڵی 2007، لە حاڵەتی ساغبونەوەی تۆمەت بەسەر ڕۆژنامەنوسدا لەسەر كاری ڕۆژنامەوانی سزای دارایی (غەرامە)ی بەسەردا دەسەپێنرێت و دەستبەجێ ڕۆژنامەنوس ئازاددەكرێت.
بەڵام لە هەندێ حاڵەتدا پەنا دەبرێتە بەیاسای ژمارە (١١١)ی ساڵی ١٩٦٩، كە ماددەی(٤٣٣)ی یاساكە كە باس لەناو زڕاندن دەكات یان پەنا دەبرێتە بەر ئەو بڕگە و ماددانەی باس لە ئاسایشی نەتەوەیی، دەكەن.
لە حاڵەتی نوسینەكەی (بەهرۆز جەعفەر) پەنا براوە بۆ یاسای سزادانی عێراقی، كە سزاكانی توندترن.
سەنتەری میترۆ داوا دەكات سەرۆك كۆمار سنگی فراوان بێت لەبەردەم نوسین و تەنانەت بڵاوكردنەوەی هەندێ زانیاری پشتنەبەستوو بە سەرچاوەكانی سەرۆكایەتی كۆمار، چونكە دەرگای زانیاری هەموو كات ئاوەڵا نین بۆ نوسەران و رۆژنامەنوسان.
مافی هەر كەسێكە لەكاتێكدا هەست دەكات هەر نوسەر، رۆژنامەنوس چالاكوانێك ، ناوی زڕاندووەو هەواڵی ناراستی دەربارەی كارەكانی بڵاوكردۆتەوە پەنا بۆ یاسا ببرێت، كە بەلای ئێمە ئەو یاسایە یاسای رۆژنامەگەرییە نەك یاسایەكی تر.
سەنتەری میترۆ لە كاتێدا داوای گۆرینی مادە یاساییەكە دەكەین بۆ یاسای رۆژنامەگەری و بە كەفالت ئازاد بكرێت، رایدەگەیەنین: بوونی نوسەر، چالاكوان لە تەقیفكردن لەسەر پۆستی تۆرە كۆمەڵایەتییەكان، یان سایت و رۆژنامەكان، كارێكە بەخراپ دەشكێتەوە بۆ هەر كەس و سیستمێك كە بانگەشە بۆ دێمۆكراسیەت و كرانەوە دەكەن.
رێكخەری سەنتەری میترۆ
زۆرترین بینراو
© 2020 Awene Online, Inc. All Rights Reserved.
×