جەلال جەوهەر: دوبەرەكی و گەندەڵی متمانەی بە پرسی كوردو هێزە سیاسییەكان نەهێشتوە
  2020-09-26       455       

جەلال جەوهەر، ئەندامی خانەی راپەڕاندنی بزوتنەوەی گۆڕان پێی وایە "داگیرکەران تارادەیەکی زۆر سەرکەتوبون لە بەکارھێنانی کورد بۆ جێبەجێکردنی ئامانجەکانیان."و دەشڵێت: دو بەرەکی و گەندەڵی وەک دو دەردی کوشندە، بڕواو ئومێدو متمانەی بە پرسی کوردو بە هێزو لایەنە سیاسییەکانی کوردستان نەھێشتوەو لە دەستدانی نیوەی خاکی کوردستانیش میللەتی کوردی بێ هیواترکرد.

ئاوێنە: جەلال جەوهەر، ئەمڕۆ شەممە، لە بەشی سێیەمی وتارێكدا سەبارەت بە پەیوەندی خەڵك و لایەنە سیاسییەكانی هەرێم وتویەتی"گەندەڵی بەرفراوان و هەمە لایەنەو شەڕوململانێی حیزبایەتی بۆ بەرژەوەندی کەسیەتی و حیزب، ئێش و ئازاری سیاسی، کۆمەڵایەتی، ئابوری و دارایی، دەرونی،... گەیاندۆتە بەشێکی زۆری تاکەکانی کوردستان."

ئەوەشی خستۆتەڕو"دو بەرەکی و گەندەڵی وەک دو دەردی کوشندە، بڕواو ئومێدو متمانەی بە پرسی کوردو بە هێزو لایەنە سیاسییەکانی کوردستان نەھێشتوە تا ڕادەیەکی زۆر."

جەختیشی كردۆتەوە كە "لە دەستدانی نیوەی خاکی کوردستانیش و مانەوەی میللەتەکەمان لەژێر ترس و هەڕەشەی سیاسەتی تەعریب و ڕاگواستن، میللەتی کوردی بێ هیواترکرد بە قەزیەکەی و بە پارتی و یەکێتی و ھێزە سیاسییەکان."

هەروەها باسی لەوەش كردوە كە لە بەر ئەوھۆکارانە دەنگدەری کوردستان هۆشداری یەکەمی خۆی گەیاندە دەسەڵاتداران و حیزبەکان، بە بایکۆتکردنی هەڵبژاردنەکانی ئەنجومەنی نوێنەرانی عێراق لە (12/5/2018)و هەڵبژاردنەکانی (30/9/2018) پەرلەمانی کوردستان، وەک ناڕەزایەتیکی توندی جەماوەری کوردستان.

بە بڕوای ئەو سەركردەیەكی بزوتنەوەی گۆڕان، رەواندنەوە و نەھێشتنی مەترسییەکان بەوە دەبێت، کە دەسەڵات خۆی چاک بکات وەک ھەنگاوی یەکەم، چونکە لە ماوەی ڕابردودا ھێزو لایەنە چەکدارەکانی دەسەڵات گەورەترین ھەڕەشە بون بۆ سەر ژیان و گوزەرانی ھاوڵاتیان بەھۆی گەندەڵی و نەبونی دیموکراسی راستەقینە.

لێرە كلیك بكە بۆ خوێندنەوەی دەقی وتارەكە.

 

زۆرترین بینراو
© 2020 Awene Online, Inc. All Rights Reserved.
×