فەرماندەیی ئۆپەراسیۆنە هاوبەشەكانی سەربە سوپای عێراق رایگەیاند، فەرمانی دەستیگركردن بۆ فەرماندەی ئەو هێزە دەركراوە كە بەرپرسیارێتی ئەو ناوچەیەی لە ئەستۆیە كە ئەمشەو لێیەوە چەند موشەكێك ئاڕاستەی هەولێر كراون.
ئاوێنە: فەرماندەیی ئۆپەراسیۆنە هاوبەشەكانی سەربە سوپای عێراق، ئەمشەو چوارشەممە، لە بەیاننامەیەكدا رایگەیاند"گروپێكی تیرۆریست ئێوارەی ئەمڕۆ هەڵساون بە كردنە ئامانج پارێزگای هەولێر بە ژمارەیەك موشەك لەڕێگەی ئۆتۆمبێلێكی جۆری كیا كە موشەكی راجیمەی لەسەربوە."
ئەوەشی خستۆتەڕو: ئەو موشەكانە لە باكوری رۆژئاوای هەولێر و لە نزیك ژمارەیەك گوند كەوتونەتە خوارەوەو دو لە موشەكەكان لە نزیك كەمپی حەسەن شامی ئاوارەكان كەوتونەتە خوارە.
ئاماژەی بەوەشداوە كە ئەو موشەكانە لە دۆڵی "ترجەلە" لە قەزای حەمدانیە-وە لە پارێزگای نەینەوا هاوێژراون و زیانیان لێنەكەوتۆتەوە.
بەپێی بەیاننامەكە ئەو ئۆتۆمبێلەی لێیەوە موشەكەكان هاوێژراون سوتاوە.
هێمای بۆ ئەوەش كردوە كە فەرمانی باڵا دەرچوە بۆ دەستگیركردنی فەرماندەی ئەو هێزە كە بەرپرسی ئەو ناوچەیەیە كە موشەكەكانی لێوە هاوێژراون و دەست بە لێكۆڵینەوەش كراوە.