ویلایەتە یەكگرتوەكانی ئەمریكا، ئەمڕۆ پێنجشەممە، رایگەیاند، هێرشەكانی گروپە چەكدارەكانی سەربە ئێران بۆ سەر بەرژەوەندییەكانی وڵاتەكەی لە عێراق قبوڵناكەن و هەڕەشەی تۆڵەكردنەوەی هێرشەكانیشی كرد.

ئاوێنە: دەیڤید شینگەر، یاریدەدەری وەزیری دەرەوەی ئەمریكا بۆ كاروباری رۆژهەڵاتی نزیك رایگەیاند"ناتوانین هەڕەشەكانی بۆ سەر هاوڵاتیانمان و سوپاكە لە دەرەوەی وڵات قبوڵ ناكەین. هیچ دودڵیش نین لە وەڵامدانەوەیان، ئەگەر پێویست بێت بۆ پاراستنی سەربازەكانمان و هاوڵاتیانمان."

شینكەر وتیشی"گەورەترین كێشە لە عێراق ئەو میلیشیایانەن كە لەلایەن ئێرانەوە پشتیوانی دەكرێن و سەقامگیری دەخەنە مەترسییەوەو هێرشدەكەنە سەر ئەمریكا. چەك بەدەست حكومەتەوە نییە، ئەم گروپانە بەردەوامن لەسەر ئاڕاستەكردنی موشەك بۆ باڵیۆزخانەكەمان و هێرشكردنە سەر ئەمریكییەكان."

یاریدەدەرەكەی وەزیری دەرەوەی ئەمریكا هەڕەشەی وڵاتەكەی لە عێراق بۆ داخستنی باڵیۆزخانەكەی لە بەغدا پشتڕاست نەكردەوەو هەروەها رەتیشینەكردوەو وتی: لەوبارەیەوە لێدوان نادەین.

ناوبراو جەختی كردەوە كە وەزارەتی دەرەوەی ئەمریكا سورە لەسەر بەردەوامی كاركردن لەگەڵ دەسەڵاتدارانی عێراق بۆ دەستەبەركردنی پاراستنی بەرژەوەندییەكانی ئەمریكا.